Jambyl oblysynda fosfor kenin óndirýdi onlaın rejimde baqylaıdy
TARAZ. QazAqparat - Sarysý aýdanyndaǵy taý-ken kásipornynda óndiriske kompıýterlik basqarý júıesin engizý boıynsha álemniń jetekshi kompanııalarynyń tájirıbesi qoldanyldy, dep habarlaıdy «QazAqparat» HAA tilshisi Jambyl oblystyq ákimdiginiń baspasóz qyzmetine silteme jasap.
Eske salaıyq, 2010 jyldan bastap «EýroHım» iri halyqaralyq mıneraldy-hımııa kompanııasy ınvestıtsııalyq jobalardy júzege asyrý aıasynda Qarataý-Jańatas fosforıttik basseınindegi birqatar ken oryndaryn ıgerýde, sondaı-aq Sarysý aýdanynda (Jańatas qalasy) keń aýqymdy mıneraldy tyńaıtqyshtar óndiretin iri zaýyt salýda.
Jaqynda «EýroHım-Tyńaıtqysh» taý-ken óndirý kásipornynyń óndiristik protsesine (ınvestıtsııalyq jobanyń quny 950 mln dollar) «Aqyldy karer» júıesi engizildi.
Endi ortalyq dıspetcherlik kásipornynan onlaın rejiminde fosfor kenin shyǵaratyn karerdegi tehnıkalardyń qozǵalysyn, otyn shyǵynyn, ken óndirýdi, ony óńdeý keshenine jetkizýdi, sondaı-aq daıyn ónimdi temirjol vagondaryna tıeýdi qadaǵalaýǵa bolady.
Kásiporyn dırektory Bolat Kárimovtiń aqparaty boıynsha, qazirgi tańda ken óndirý kólemi jylyna 2 mln tonnaǵa jetken. Munda bir aıda 55 myń tonna fosfor unyn shyǵarady.
Bolashaqta hımııa kesheni jobasyn júzege asyrýdyń ekinshi kezeńi aıaqtalǵannan keıin, Jańatasta jobalyq qýattylyǵy jylyna 1,4 mln tonna bolatyn mıneraldy tyńaıtqyshtar óndirisi iske qosylady. Atalmysh joba 2020 jylǵa josparlanǵan. Ótkizý naryǵy da belgili Bul elder: Ortalyq Azııa, Reseı jáne Qytaı.
Eske sala keteıik, Úkimet basshysy Baqytjan Saǵyntaev 2017 jyldyń 17 qarashasynda Jambyl oblysyna jumys saparymen barǵan edi. Sapar barysynda ol birqatar áleýmettik jáne ónerkásiptik nysandardy aralady. Úkimet basshysy sheteldik ınvestorlarmen birlesip júzege asyrylyp jatqan Indýstralızatsııa kartasyna kiretin birqatar iri ónerkásiptik nysandarmen tanysqan edi.
Aıta keteıik, Qazaqstan Respýblıkasynyń ındýstrıaldy-ınnovatsııalyq damý memlekettik baǵdarlamasy aıasynda Jambyl oblysynda jalpy ınvestıtsııalyq kólemi 159 mıllıard teńge bolatyn 53 kásiporyn iske qosyldy. 6200 jańa jumys oryny ashyldy.
2017 jyldyń basynan beri óńirdegi ónerkásiptik óndiristiń kólemi 226,9 teńgeni qurasa, naqty kólem ındeksi - 100,6% bolǵan.
