Jambyl oblysynda fosfogıps baqsha sharýashylyǵyna zııan keltirip otyr - senator
Senator Úkimet basshysy Álıhan Smaılovtyń atyna joldaǵan óziniń depýtattyq saýalynda Jambyl oblysynyń aýyl turǵyndarynyń problemalaryn jarııa etti. Depýtattyń óńirge sapary barysynda jergilikti turǵyndar qorshaǵan ortanyń lastanyp jatqanyn, atap aıtqanda, óńirdegi hımııa ónerkásibiniń óndiris qaldyǵy týraly, quramynda kóp mólsherde fosfogıps bar qoqysty tastaıtyn jerge qatysty problemany kóterdi.
Depýtat keltirgen derekter boıynsha, ótken jyly tastalǵan fosfogıps qaldyqtarynyń lımıti jylyna 1,3 mln tonnany quraǵan kórinedi. Mıneraldy tyńaıtqyshtar óndirisi bıyl 2 ese ósken, ıaǵnı qaldyqtar burynǵydan da kóp bolady. Esep boıynsha jylyna 2,7 mln tonna qaldyq bolady.
Senator Taraz qalasyndaǵy eki úıindide 14 mln tonnadan astam fosfogıps jınalǵanyn aıtty. Aýdany 25 ga bolatyn úıindilerdiń biri Shaıqoryq aýylynan bir shaqyrym jerde ornalasqan.
«Bul úıindiler Taraz qalasy men Shaıqoryq, Tanty eldi mekenderiniń mańyna jaqyn ornalasýyna baılanysty adam ómirine jáne qorshaǵan ortaǵa úlken qaýip tóndirip otyr. Máselen, daýyldy jel kóterilgen kezde úıindilerden eldi mekenderge qaraı shańdy zattardyń ushýy baıqalady. Jergilikti turǵyndardyń aıtýynsha, fosfogıps saldary aýyl sharýashylyǵy men baqsha sharýashylyǵyna úlken zııan keltirip otyr. Sondaı-aq, jaqyn mańdaǵy aýyldarda adamdardyń tynysy tarylatyn kezderde jıi bolatynyn jetkizgen edi», - dedi senator.
Bekbolat Orynbekov sondaı-aq Taraz qalasynan 20 shaqyrym jerde aýdany 135 ga bolatyn úshinshi úıindi salý josparlanǵanyn aıtty, alaıda bul úıindi 2025 jyly ǵana iske qosylatyn bolady.
Senator osyǵan baılanysty Úkimet basshysy Á. Smaıylovtan fosfogıps qaldyqtarynyń kólemin azaıtý jóninde sharalar qabyldaýdy surady jáne topyraǵy tozǵan jerdi daqyl ósirý úshin aýyl sharýashylyǵynda paıdalanýdy usyndy.
«Sonymen qatar, fosfogıpsti jol tósemderiniń negizderin ornatý úshin paıdalaný zerttelýde. Osy baǵytta, «Pavlodar-Ýspenka – RF shekarasy» avtomobıl joldarynyń topyraqtaryn turaqtandyrý úshin fosfogıps materıalyn synaý maqsatynda tájirıbelik-eksperımenttik ýchastik bólinip, búgingi kúni zertteý jumystary júrgizilip jatyr», - dedi depýtat óz saýalynda.
