Jambyl oblysynda erekshe ýchaskelik polıtsııa pýnkti ashyldy
TARAZ. QazAqparat – Jambyl oblysy Baızaq aýdanynda erekshe jańa ýchaskelik polıtsııa pýnkti ashyldy. Ereksheligi sol – onda ýchaskelik polıtsııa qyzmetkeri tek jumys istep qana qoımaı, otbasymen birge emin-erkin tura alady, dep habarlaıdy QazAqparat tilshisi.
Jambyl oblysynyń Baızaq aýdany Býryl aýyldyq okrýginde jergilikti atqarýshy organdardyń kúsh salýymen jańa ýchaskelik pýnkt salyndy, onda ýchaskelik polıtsııa qyzmetkeriniń jáne onyń otbasynyń ómir súrýine barlyq jaǵdaı jasalǵan.
Jańa formattaǵy mundaı pýnkt Jambyl oblysynyń aýmaǵynda alǵash ret paıdalanýǵa berilip otyr.
Aldaǵy ýaqytta oblystyń PD basshylyǵy osy úrdisti jalǵastyrýdy josparlaýda. Aıta keterligi, turǵyn jaı qajetti jıhazben, tehnıkamen, baılanys quraldarymen jáne beınebaqylaý júıesimen jabdyqtalǵan.
Bul azamattarmen qarym-qatynas protsesi únemi baqylaýda ekenin bildiredi, sondaı-aq sybaılas jemqorlyq áreketterine de tosqaýyl bolady.
«Bul ákimshilik ýchaskege úsh jylǵa qyzmetke bekitildim. Jumys ońaı emes, mindetime qoǵamdyq tártipti qorǵaý, bekitilgen ýchaskede qoǵamdyq qaýipsizdikti qamtamasyz etý, sondaı-aq júgingen nemese shaǵymdanǵan jaǵdaıda halyqqa ózge de kómek kórsetý kiredi. Kontıngent ártúrli, árqaısysyna jeke kózqaras qajet, aıta ketý kerek, aýmaqta 12 943 adam turady, onyń ishinde 72 adam ІІO-da esepte. Qarýdy alyp júrýge jáne saqtaýǵa ruqsaty bar 57 azamat bar, olardyń QR zańnamasyn saqtaý jáne oryndaý sharttaryn qadaǵalaý qajet. Qazirgi ýaqytta aýmaqta 22 qylmys deregi tirkeldi, onyń 16-sy ashyldy, jumys jetkilikti», -deıdi Baızaq aýdany Býryl okrýginiń ýchaskelik ınspektory Aıdyn Qorǵanbaev.
Aıta ketý kerek, jalpy, Jambyl oblysynda 355 ýchaskelik polıtsııa ınspektory jumys isteıdi, olar azamattardyń tynyshtyǵyn kúzetip, quqyqtary men múddelerin qorǵaıdy.
Olardyń arasynda óz ómirin qaterge tigip, adam ómirin birneshe ret qutqaryp, qylmysqa qarsy kúreste jáne qylmysty ashýda aıtarlyqtaı kómek kórsetkender az emes.
Ýchaskelik ıspektorlar qyzmetiniń tıimdiligin arttyrý jáne qyzmet atqarý jaǵdaıyn jaqsartý QR ІІM men Jambyl oblysynyń polıtsııa departamentiniń erekshe baqylaýynda.
