Jambyl oblysynda emhanalar medıtsınalyq anyqtamalardy satyp kelgen

TARAZ. QazAqparat - Jambyl oblysyndaǵy keıbir emhanalarda medıtsınalyq anyqtama 4 myń teńgege, al biliktilik jónindegi sertıfıkattyń quny 55 myń teńgege saýdalanyp kelgen, dep habarlaıdy QazAqparat.

Óńirdiń densaýlyq saqtaý salasyndaǵy atalmysh jemqorlyq áreketter «Jambyl adaldyq alańy» jobasy aıasynda belgili bolǵan.

«Joba sheńberinde medıtsına mekemeleriniń qyzmet kórsetý sapasyna, sybaılas jemqorlyq áreketterine qatysty jasyryn saýalnama júrgizildi. Nátıjesi oıdaǵydaı emes. Tipti, birqatar qyzmetkerler «barmaq basty, kóz qysty áreketterge» jol beretinderdiń atyn atap, túsin tústegen. Al emdelýshilerdiń 22-si dárigerlerdiń jumysyna kóńili tolmaıtyn bolyp shyqty. Departament mamandary Baızaq aýdandyq ortalyq aýrýhanasynda jumysqa jaramdy degen anyqtamany sondaǵy aq halattylar 4 myń teńgege saýdalaǵanyn anyqtaǵan», - dedi oblystyq Memlekettik qyzmet isteri jáne sybaılas jemqorlyqqa qarsy is-qımyl departamentiniń basshysy Ravıl Tólebaev.

Budan bólek, «medıtsınalyq biliktilikti arttyrdy» degen sertıfıkattyń baǵasy 55 myń teńge ekeni belgili bolǵan. Qazirgi tańda bul istermen quzyrly organdar aınalysyp jatyr. Department basshysynyń aıtýynsha, densaýlyq saqtaý salasyn jaılaǵan jemqorlyqty joıýǵa baǵyttalǵan is-sharalar aldaǵy ýaqytta da jalǵasatyn bolady.