Jambyl oblysynda eki jylda 30 jańa medıtsınalyq nysan salynady
Bul joly oblys basshysy Qordaı aýdanyndaǵy Otar jáne Kenen aýyldyq okrýgteriniń turǵyndarymen kezdesý ótkizdi. Okrýgte jalpy sany 11 544 adam turady.
Oblys ákimine Otar aýylynyń turǵyndary jedel járdem qyzmetiniń nasharlyǵy, mektep kabınetterin jańartý qajettigi, jaıylym tapshylyǵy týraly aıtty. Al Kenen aýyldyq okrýginiń halqy dárigerlik ambýlatorııany keńeıtý, jol jóndeý, qoqys jınaý, respýblıkalyq avtojolǵa mal ótkelin salý sekildi máselelerdi alǵa tartty.
«Aýyldyq okrýgte birqatar jumystar atqarylyp, biraz máseleler sheshilgen. Degenmen, aýdannyń keshendi damý josparyna sáıkes, áli de atqarylatyn jumys az emes. Dárigerlik ambýlatorııaǵa qatysty máseleni sheshýdi bıyldan bastap qolǵa alamyz. Keler jyly ol paıdalanýǵa beriletin bolady. Jalpy, aldaǵy eki jylda oblysta 30 jańa medıtsınalyq nysan boı kóteredi. Kúrdeli jóndeý jumystaryn qajet etetin nysandar da nazardan tys qalmaıdy»,– dedi Nurjan Nurjigitov.
Aıta keteıik, buǵan deıin Jambyl oblysynda 70 kópqabatty úı salynyp jatqanyn habarlaǵan bolatynbyz.