Jambyl oblysynda eki bala demalys ornyndaǵy basseınge batyp ketti

TARAZ. QazAqparat - Jambyl oblysy Merki aýdanynda demalys ornynda kámeletke tolmaǵan eki bala sýǵa tunshyǵyp qaıtys boldy, dep habarlaıdy QazAqparat tilshisi.

Oqıǵa 2 tamyz kúni keshki saǵat 18:58-de Merki aýdany Merki aýyly Ismaılov kóshesi 200 «B» mekenjaıynda ornalasqan «Big Family» demalys aımaǵynyń aýmaǵynda bolǵan.

«Demalýshylar 2012 jyly jáne 2010 jyly týǵan eki balanyń denelerin sýdan alyp shyqty. Olar eresekterdiń qaraýynsyz jáne demalys aımaǵynyń qutqarýshylarynyń nazarynan tys qalyp, kóshe basseıninde júzý kezinde sýǵa batyp, oqıǵa ornynda qaıtys boldy», – dep habarlady Jambyl oblystyq tótenshe jaǵdaılar departamentiniń baspasóz qyzmeti.
Aıta keteıik, buǵan deıin Jambyl oblysynda ata-anasynyń qaraýynsyz qalǵan eki er bala sýǵa batyp ketkenin habarlaǵan bolatynbyz. Jambyl oblysynyń Shý qalasynda jergilikti turǵyn káriz tazartý qondyrǵysynan 2013 jyly týǵan eki balanyń denesin taýyp, alyp shyqty.
Jambyl oblystyq tótenshe jaǵdaılar departamenti baspasóz qyzmetiniń habarlaýynsha, oqıǵa 9 shilde kúni saǵat 18:00-der shamasynda bolǵan. Eresekterdiń qaraýynsyz qalǵan balalar oınap júrip, sýǵa qulap, batyp ketkeni anyqtaldy.