Jambyl oblysynda eki aıda 54 medıtsına qyzmetkeri koronavırýs juqtyrǵan
TARAZ. QazAqparat – Jambyl oblysynda jyl bastalǵaly beri 54 medıtsına qyzmetkeri koronavırýs juqtyrǵan, - dep habarlaıdy QazAqparat tilshisi.
Óńirdegi koronavırýs ınfektsııasynyń epıdemıologııalyq jaǵdaıy týraly Jambyl oblysy ákiminiń orynbasary Erjan Jylqybaevtyń tóraǵalyǵymen keńes otyrysy ótip, onda qalyptasyp otyrǵan ahýal saralandy. Ókinishke qaraı, búginde oblystaǵy Qordaı, Jýaly aýdandary men Taraz qalasynda indet juqtyrǵandar azaımaı tur. Sondyqtan talapty kúsheıtý jaıy qaraldy.
«Medıtsına salasynyń qyzmetkerleri, muǵalimder men oqýshylardyń syrqattanyp jatqany janǵa batady. Naqty sandarǵa júginsek, elimizde koronavırýs ınfektsııasy taralǵaly beri oblys boıynsha – 411, onyń ishinde bıyl 54 medıtsına qyzmetkeri indet juqtyryp aldy. Syrqattanǵan azamattardyń 70 paıyzy jumys ornynan tys jerde juqtyrǵan. Dese de, densaýlyq saqtaý salasy mamandaryn qajetti qorǵanys kıimderimen qamtýǵa basa nazar aýdarý qajet. Bul maqsatta respýblıkalyq bıýdjetten 2 mıllıard 735 mıllıon teńge bólinip, oǵan maska, arnaıy kıimder sekildi kerek-jaraqtyń barlyǵy alyndy. Bul qor kún ótken saıyn tolyǵyp keledi. Máselen, sońǵy esep boıynsha aımaqta atalǵan zattardyń 77 kúnge jetetin mólsheri bar»,-dep jazdy Erjan Jylqybaev óziniń Feısbýk áleýmettik jelisindegi jeke paraqshasynda.
Sondaı-aq, oblys ákiminiń orynbasary indetke qarsy turýdyń eń tıimdi joly – vaktsınalaý ekenin aıtady. Ásirese, ekpe aýrýdyń oshaǵynda júrgen medıtsına qyzmetkerleri úshin asa qajettigine aıryqsha toqtalǵan.
«Jeltoqsan men qańtar aılarynda birqatar densaýlyq saqtaý salasy qyzmetkerleri erikti túrde ekpe saldyrǵan bolatyn. Budan bólek, jyl basynan beri aq halattylarǵa 850 doza vaktsına taǵy egildi. Nátıjesinde aımaqta 1 180 maman vaktsınamen qamtyldy. Bul jumystardy jalǵastyrý maqsatynda kúni keshe qosymsha 5 250 doza ekpe taǵy jetkizildi. Jalpy 13 870 densaýlyq saqtaý qyzmetkerin vaktsınamen qamtý kózdelgen»,-dedi E. Jylqybaev.
Sonymen qatar, oblysta bilim salasy qyzmetkerlerin vaktsınalaý jumystary da bastaldy. Ekpe salý eń áýeli bastaýysh synyp muǵalimderine júrgiziledi. Ol úshin aıdyń sońyna deıin taǵy 6 myń doza vaktsına alý josparlanǵan. Al ekpe egýdiń úshinshi kezeńinde stýdentterdi qamtý kózdelip otyr. Bul sharýalar densaýlyq saqtaý salasynyń mamandary men muǵalimderdiń arasynda aýrý taralýyn tejeýge óz áserin tıgizbek.
Jıyn barysynda aımaqtaǵy koronavırýs ınfektsııasynyń epıdemıologııalyq ahýaly jáne Taraz qalasy men aýdandardaǵy monıtorıngtik toptardyń jumystaryn da talqylady.
