Jambyl oblysynda eki aýylǵa kógildir otyn kirdi
Turǵyndardy aýdan ákiminiń orynbasary Qaırat Ismaıl arnaıy baryp quttyqtady.
«Aýdandaǵy 43 eldi meken bar desek, búginde gazdandyrylǵan aýyldar qataryna Sarybaraq aýyly 38-inshi, Shahan aýyly 39-ynshy aýyl bolyp kirse, jýyq arada Úshbulaq 40-ynshy jáne Qaınar 41-inshi bolyp qosylady. Sonymen kelesi jyly eki eldi meken – Aqsholaq pen Tórtkól aýyly gazdandyrylyp, aýdan boıynsha kógildir otynmen tolyq qamtamasyz etýge qol jetkiziledi», - degen Qaırat Ábilhanuly aýyl halqyn qýanyshty sátterimen quttyqtady.
Aýyldyq okrýg ardagerler keńesiniń tóraǵasy Elemes Esimov aıtýly sharaǵa atsalysyp, qoldaý kórsetken oblys jáne aýdan basshylyǵyna, gaz qubyryn júrgizý isinde belsendilik tanytqan azamattarǵa aýyl turǵyndary atynan shynaıy alǵysyn bildirdi. Buǵan qosa, qýanyshty sátte júrekjardy lebizderin arnaǵan analar qaýymy da rızashylyqtaryn aıtyp, gaz jelisin tartý isinde ilkimdilik tanytqan azamattarǵa qazaqy dástúrmen ıyqtaryna shapan japty. Gaz alaýy saltanatty túrde tutatylyp, ájeler shashý shashty. Aýyl turǵyndaryna gaz ýchaskesi tarapynan «Gaz jáne ony paıdalaný erejeleri» taqyrybynda jadnamalar taratyldy.
Aıta keteıik, kógildir otynnyń kelýi buǵan deıin ot jaǵyp, kúl shyǵarǵan aýyl turǵyndarynyń beınetin azaıtpaq. Qazirgi ózinde Sarybaraq eldi mekenindegi 84 aýlanyń 61-i, Shahan eldi mekenindegi 93 aýlanyń 43-i kógildir otynǵa qosylyp úlgergen. Al qalǵan aýlalar jyl sońyna deıin kógildir otynǵa qosylmaq.
