Jambyl oblysynda eki adamdy óltirgen kúdikti ustaldy
TARAZ. QazAqparat - Moıynqum aýdanynyń Ulanbel aýylynda eki birdeı adam ólimi tirkelip, qaıǵyly jaǵdaı boldy, dep habarlaıdy «QazAqparat» HAA tilshisi Jambyl oblysy ІІD-iniń baspasóz qyzmetine silteme jasap.
«21 qyrkúıek kúni saǵat 19:10-da Moıynqum aýdandyq ІІB-ine Ulanbel aýyldyq ýchaskelik ınspektorynan osy aýyldyń 40 jastaǵy turǵyny J esimdi azamattyń mas kúıde eki birdeı aýyldasyn atyp óltirgeni jaıly habarlama kelip túsken. Ol 12-inshi kalıbrli tegis uńǵyly ań aýlaıtyn myltyqpen atqan. Onyń 49 jastaǵy M jáne 44 jastaǵy K esimdi eki kórshisi qaza tapty. Sonymen qatar, 16 jastaǵy inisi K aıaǵynan jaraqat alyp, dereý Moıynqum aýdandyq aýrýhanasyna jetkizildi», - dep habarlady quqyq qorǵaý vedomstvosynyń baspasóz qyzmeti.
Oqıǵa ornyna Moıynqum aýdandyq ІІB basshysynyń mindetin atqarýshy polıtsııa podpolkovnıgi Maqsat Jamanqulov bastaǵan bes adamnan turatyn jedel top kelip jetti.
Tekserý barysynda qarýly kúdikti aýyldaǵy úılerdiń biriniń aldynan tabyldy. Polıtsııa mashınasyn kórgen ol, kólikke qaraı oq atty. Onyń qarýdy qaıta oqtaýyna jáne ekinshi ret oq atýyna múmkindik bermeýge talpynǵan polıtsııa podpolkovnıgi Maqsat Jamanqulov táýekelge bel baılap, kólikti soǵan qaraı burdy. Soqqydan qarýyn túsirip alǵan kúdikti dereý izin jasyrýǵa tyrysty. Alaıda, kóliktegi polıtsııa qyzmetkerleri ony ustap úlgerdi. Qazirgi ýaqytta qylmys quraly tárkilenip, eki adamdy birdeı óltirgen Ulanbel aýylynyń 40 jastaǵy turǵyny J polıtsııa qyzmetkerlerine kinásin moıyndady. Sotqa deıingi tergeý amaldary júrgizilip jatyr. Kúdikti Shý aýdanyndaǵy ýaqytsha ustaý oqshaýlaǵyshyna qamaýǵa alyndy.
