Jambyl oblysynda egistiktegi kókónis dúken sóresine deldalsyz jetkizilýde
TARAZ. QazAqparat – Jambyl oblysy ákimdiginde ótken jıynda «Taraz» áleýmettik-kásipkerlik korporatsııasy qyzmetiniń bes strategııalyq baǵytyn iske asyrý jaıy talqylandy, dep habarlaıdy QazAqparat oblys ákimdiginiń resmı saıtyna silteme jasap.
Basqosýda «Taraz» ÁKK-niń jańadan taǵaıyndalǵan tóraǵasy Oljas Qarjaýov óz baıandamasynda aǵymdaǵy máseleler men olardy sheshý joldaryn atap ótti. ÁKK jumysynyń bir baǵyty boıynsha baǵany turaqtandyrý úshin «Egistik alqabynan dúken sóresine deıin» pılottyq jobasy ázirlenýde eken.
Ol negizinen jemister men kókónisterdi az mólsherde óndirýmen aınalysatyn aýyl turǵyndaryn qoldaýǵa baǵyttalǵan. Joba fermerlerge ósirilgen daqyldardy deldalsyz satýǵa jáne sýpermarkettermen tikeleı kelisim jasasýǵa kómektesetin kooperatıv jelisin damytýdy kózdeıdi.
«Fırkan» jáne «Vkýsnaıa Korzınka» saýda jelileriniń ókilderi sýpermarketterdiń pılottyq jobaǵa qatysýǵa daıyn ekendigin jetkizdi.
«Sharýa qojalyqtary men bólshek saýda jelileri arasyndaǵy tyǵyz yntymaqtastyqtyń arqasynda ónimder arzan baǵaǵa satylmaq. Sýpermarketterge taýarlardy jergilikti atqarýshy organdar belgilegen baǵamen satýdy suranamyz», – dedi Berdibek Saparbaev.
Sondaı-aq baıandamashy «Taraz» ÁKK aýylsharýashylyq tehnıkalaryn kóbeıtý, sút zaýyttarynyń qýattylyǵyn arttyrý, jemis-jıdek klasterin damytý, kartop ósirý, ara jáne balyq sharýashylyǵy, jańartylǵan energııa kózderin damytý, áleýmettik turǵyn úı salý boıynsha birneshe iri jobalardy ázirlep jatqandyǵyn jetkizdi.
Óńir basshysy barlyq jobalardy qoldaıtynyn, ásirese ara sharýashylyǵy men sútti qaıta óńdeý boıynsha jobalardy aıryqsha atap ótti.
«Shyǵys Qazaqstan oblysynda 1-synyp oqýshylaryna 15 gramm bal men 200 gramm sút tegin beriledi. Munyń densaýlyqqa qanshalyqty paıdaly ekenin bárimiz túsinemiz. Sol sııaqty bizdiń óńirde balalardy balmen jáne sútpen tegin tamaqtandyrýǵa barlyq jaǵdaı jetkilikti. Osyny jasaıtyn bolsaq, balalarymyzdyń deni saý bolyp óser edi. Bala kezinen bal men sút iship úırengen Japonııa turǵyndarynyń tájirıbesi – osynyń dáleli», – dedi oblys ákimi.
Jıynda sharýa qojalyq ókilderi de óz oılaryn ortaǵa saldy.
«Aq Bıdaı» sharýa qojalyǵynyń tóraǵasy Narıman Qalqabaev jańbyrlatyp sýarý júıesin engizýge jáne arnaıy tehnıkalar satyp alýǵa kómektesýin surady. Berdibek Saparbaev bul máselelerdiń mindetti túrde qaralatynyna ýáde berdi.
«Áleýmettik-kásipkerlik korporatsııa ınvestorlardy tartýǵa jáne óńirdiń damý núkteleri boıynsha jańa óndirister qurýǵa kúsh salýy kerek, sondaı-aq agroónerkásiptik keshen sýbektileri úshin qarjylandyrýdyń qoljetimdiligin arttyrý boıynsha jumysty kúsheıtý qajet», – dep túıindedi Berdibek Saparbaev.
