Jambyl oblysynda daýyldyń saldarynan kelgen shyǵyn mólsheri belgili boldy
TARAZ. QazAqparat - Jambyl oblysynda bolǵan daýyldyń kúshi sekýndyna 33 metrge jetip, aǵashtardy qulatyp, ǵımarattar men qurylys nysandaryn zaqymdady, dep habarlaıdy QazAqparat.
Jambyl oblystyq Tótenshe jaǵdaılar departamentiniń baspasóz qyzmetiniń habarlaýynsha, 13 sáýir kúni boıyna Tarazda batysqa qaraı baǵyttalǵan daýyldyń saldarynan qala aımaǵynda 81 tal qulady. Quzyrly organdarǵa elektr energııasynyń óshkendigi jóninde 184 habarlama kelip tústi. Birqatar mektepter men 6 kópqabatty úıdiń shatyryna zaqym keldi. №18 orta mekteptiń 3 qabatty ǵımaratyna zııan keldi jáne onyń 100 sharshy metr aımaqtaǵy shatyry julynyp ketken. Zardap shekkender men qurban bolǵandar joq.
Tabıǵı apattyń saldarymen kúreske tótenshe jaǵdaılar men ózge de salalardan 70 adam men 20 dana tehnıka jumyldyryldy. Jambyl aýdanynyń Aısha bıbi aýylynda jel QR Qorǵanys mınıstrliginiń 10216 áskerı bólimi ǵımaratynyń 210 sharshy metr aımaqty alyp jatqan shatyryn tolyqtaı ushyryp áketti. Zardap shekkender men qurban bolǵandar joq.
Baızaq aýdanyndaǵy Dıqan aýylynda sý tartýǵa arnalǵan munara qulap, eresekterge arnalǵan, týberkýlezge qarsy oblystyq shıpajaı sýsyz qaldy. Saǵat 12-30-da sý jerasty kózderinen qaıta berile bastady.
Shý aýdanynda Shý qalasy (12 994 abonent) men Báıdibek (161), Abaı (260), Aqsý aýyly (284) men Tóle bı aýylynda (284) elektr energııasyn berý toqtatyldy. Osy kúni keshkisin elektr qýatymen qamtý jumystary tolyqtaı qalpyna keltirildi.
Aıta keteıik, 13 sáýir kúni daýyl týraly eskertý jarııalanǵan bolatyn. Sınoptıkter nóser jaýyn jaýady dep boljam jasady. Jeldiń kúshi ońtústik batystan jáne batystan sekýndyna 15-20 metr jyldamdyqpen soǵady dep eskertildi. 12 sáýir kúni keshkisin nóser jaýyn toqtap, jel kúsheıgen bolatyn.
