Jambyl oblysynda daýyl saldarynan keltirilgen shyǵyn esepteldi
TARAZ. QazAqparat - Óńirdegi ǵımarattar men qurylystardy qıratyp, aǵashtardy qulatqan daýyldyń jyldamdyǵy 33 m/s-ke jetken, dep habarlaıdy «QazAqparat» HAA tilshisi.
Jambyl oblystyq TJD baspasóz qyzmeti habarlaǵandaı, Tarazda 13 sáýirde kúni boıy turǵan jel saldarynan 81 aǵash qulaǵan. «TQES» JShS-ǵa elektr energııasynyń óship qalǵandyǵy týraly 184 habarlama kelip túsken. Sondaı-aq, eki mektep pen alty kópqabatty turǵyn úıdiń shatyry ushyp ketken. Zardap shegýshiler joq.
Tarazdaǵy daýyldyń saldaryn joıý úshin Jambyl oblystyq TJD «Jedel qutqarý jasaǵy» MM jáne «Órt sóndirý qyzmeti jáne apattyq-qutqarý jumysy» MM bólimshesi jumyldyrylyp, «Taraz qalalyq elektr stansasy» JShS 14 jóndeý brıgadasy men «Jasyl El-Taraz» JShS aǵash kesý brıgadasy tartyldy. Barlyǵy 70 adam men 20 tehnıka daýyldyń saldaryn joıdy.
Jambyl aýdanynyń Aısha bıbi aýylynda QR QM 10216 áskerı bóliminiń 210 sharshy metrlik aýmaǵynda kazarmanyń shatyry tolyǵymen julynyp ketken. Eshkim zardap shekpedi.
Baızaq aýdanynyń Dıhan aýylyndaǵy sý munarasynyń syıymdylyǵy tómendep, eresekterge arnalǵan oblystyq týberkýlezge qarsy sanatorııada sý toqtap qaldy. Saǵat 12:30-da qalpyna keltirildi.
Shý aýdanynyń Shý qalasynda (12 994 abonent), Báıdibek aýylynda (161 abonent), Abaı aýylynda (260), Aqsý (284) jáne Tóle bı (95)aýdandarynda elektr energııasy sónip qaldy. Sol kúni keshkisin jaryq qaıta qalpyna keltirildi.
Eske salaıyq , 13 sáýir kúni eskertý jarııalandy. Sınoptıkter óńirde jańbyr nóserge ulasyp, ońtústik batystan, batystan soqqan jeldiń jyldamdyǵy sekýndyna 15-20 metr bolyp, 30 metrge deıin jetedi dep boljaǵan. 12 sáýir keshke Tarazda jaýyn tolastamady, jel kúsheıe tústi. Qulaǵan aǵashtar joldy bógep, júrgizýshilerge qıyndyq týdyrdy. Qalada baǵdarshamdary isten shyqty, keı aýdandarda jaryq óshti.
