Jambyl oblysynda dári-dármektiń eki aıǵa jetetin qory bar
Bul másele boıynsha habarlama jasaǵan «Jambyl - adaldyq alańy» jobalyq ofısiniń jetekshisi Názıma Jývandıkova zerdeleý nátıjelerimen qatar birqatar usynystaryn ortaǵa saldy.
«Jobalyq ofıske turǵyndar tarapynan kelip túsetin shaǵymdar mazmunyna sáıkes, oblys ákimdiginiń densaýlyq saqtaý basqarmasy eki aılyq dári-dármek qory jóninde aqparattandyrý jumystaryn jandandyrý qajet. Sonymen qatar basqarmaǵa qarasty mekeme basshylaryn «Antıkor Live» jobasy aıasynda onlaın qoǵamdyq qabyldaý júrgizý kerek», - dedi ol.
Sondaı-aq Jambyl oblysy boıynsha densaýlyq saqtaý mekemelerinde arnaıy qurylǵan dárigerlik konsýltatsııalyq keńes quramy men komıssııa tóraǵasyn jyl saıyn ózgertý qajettiligi týyndap otyr. Bul múmkindigi shekteýli azamattar tarapynan shaǵym sanyn azaıtady.
«Budan bólek jumysqa qabyldaý konkýrsyna ashyqtyqty qamtamasyz etý úshin qoǵam ókilderin, jobalyq ofıs menedjerlerin qatystyrýǵan jón», - dedi N.Jývandıkova.
Óz kezeginde aımaq basshysy atalǵan usynystardy qoldaıtyndyǵyn aıta kele, naqty mindetterge toqtaldy.
«Byltyrǵy jaǵdaıdan sabaq alýymyz kerek. Qazirgi tańda aımaqta dári-dármektiń eki aıǵa jetetin qory bar. Biz Densaýlyq saqtaý mınıstrligimen birlese otyryp, bul máseleni nazarda ustap otyrmyz. Oblystyq densaýlyq saqtaý basqarmasyna dárigerlerdiń kásibıligi men mádenıetin kóterýge qatysty tapsyrma berildi. Qarapaıym naýqastar nege jeke klınıkalarda qaralǵysy keledi? Nege memlekettik aýrýhanalarǵa barmaıdy? Biz budan tıisti nátıje shyǵarýymyz kerek. Sonymen qatar densaýlyq saqtaý mekemelerinde arnaıy qurylǵan dárigerlik konsýltatsııalyq keńes quramy men komıssııa tóraǵasyn aýystyrý jaıyn da qarastyrý kerek. Bir qyzmetti on jyl boıy atqaryp otyrǵan azamattar ol oryndy jeke menshikke satyp almaǵan shyǵar? Jaqsy jumys istep jatsa, áńgime basqa. Al aryz-shaǵym kóbeıse, aýystyrý qajet», - dedi B.Saparbaev.
