Jambyl oblysynda dala órti kezinde 50 gektardaǵy sekseýil janyp ketti
TARAZ. QazAqparat – Jambyl oblysynda dala órtenip, 50 gektar aýmaqtaǵy sekseýil aǵashtary men shóp janyp ketti, dep habarlaıdy QazAqparat.
Jambyl oblysyndaǵy Aqkól orman sharýashylyǵyna qarasty Shabaqty jerinde iri órt boldy. Tilsiz jaýdyń saldarynan aýqymy 50 gektar qýraǵan shóp pen sekseýil aǵashtary janyp ketti. Órt sóndirýshiler qyzyl jalynmen úsh kún boıy arpalysty. Ot tóńirekke lezde tarap, mańaıdaǵy birneshe sharýa qojalyqqa qaýip tóndirdi. Órtti aýyzdyqtaýǵa jergilikti eriktiler toby men órt sóndirýshiler jumyldyryldy.
«Qazir órt tolyqtaı sóndirilgen. Aıta ketý kerek, oblysta jyl basynan beri 11 dala órti tirkelip, 37 myń gektar jer janyp ketken. Aldyn ala boljam boıynsha qorshaǵan ortaǵa 3 mıllıon teńgeden astam shyǵyn kelip otyr. Órttiń kóp janýyna aýmaqtyń sýsyz bolýy jáne qatty jeldiń sebepshi boldy. Órt sóndirýge jalpy 6 tehnıka, 60 adam jumyldyryldy», - deıdi oblystyq Tótenshe jaǵdaılar departamenti órt sóndirý qyzmetiniń jedel kezekshisi Talas Nazarov.
