Jambyl oblysynda tsıfrlandyrylǵan 71 aqparattyq ortalyq ashylady

TARAZ. QazAqparat - Jambyl oblysynda byltyr aýdan ortalyǵy men eldi mekenderde 71 tsıfrlandyrylǵan aqparattyq ortalyq ashylǵan. Bıyl taǵy 71 osyndaı ortalyq ashý, sol arqyly olardyń sanyn 142-ge jetkizý kózdelip otyr, dep habarlaıdy QazAqparat.

Byltyr óńirde ashylǵan tsıfrlandyrylǵan 71 aqparattyq ortalyqqa barlyǵy 78,2 mıllıon teńge jumsalǵan. Bıyl bul baǵytta 94,6 mıllıon teńge qajettigi anyqtalǵan.

«Kitaphanalardan ashylǵan ortalyqtar ishinde - 1 brodkastıng zaly, 17 kovorkıng, 53 tsıfrlandyrylǵan aqparattyq ortalyq bar. 2019 jyly mádenıet, klýb úılerinde taǵy osyndaı 71 ortalyq ashý múmkindikterin qarastyrýdamyz. Al, 2020 jyly 80 kitaphanada ashý kózdelýde. Qalǵan 49 kitaphana tsıfrlandyrylǵan aqparattyq ortalyq ashýǵa tıimsiz» -deıdi oblystyq mádenıet, arhıvter jáne qujattama basqarmasynyń basshysy Dúısenáli Byqybaev.

Sondaı-aq, ol óńirdegi kitaphanalar mobıldi standartqa kóshirilip, «Qasıetti Taraz» saıty jumysyn bastaǵanyn jetkizdi.

Aıta ketý kerek, bul jumystar negizinen aýyl turǵyndarynyń ıgiligine arnalǵan. Aýyl turǵyndary ortalyq arqyly búginde egov.kz portalymen 6 túrli memlekettik qyzmetti alýda. Onda turǵyndardyń kúndelikti turmysyna qajetti 1 009 anyqtama beriledi. Olardyń qatarynda balabaqshaǵa kezekke turý, nekege turýǵa ótinish, meken-jaıy, sottalmaǵandyǵy, jyljymaıtyn múlki, salymnyń qarajat túsý qozǵalysy, zeınetaqy qory týraly jáne taǵy basqalar bar.

Ǵıbrat Sembaı