Jambyl oblysynda byltyr qaterli isikten 768 adam kóz jumǵan
TARAZ. QazAqparat – Byltyr Jambyl oblysynda 7652 aýrý qaterli isikpen esepke alynǵan. Al, 2019 jyly 7360 naýqas tirkelgen. ıAǵnı esepke turǵandar sanynyń óskeni baıqalady. Bul týraly búgin óńirlik kommýnıkatsııalar qyzmeti alańynda Jambyl oblystyq kópbeıindi aýrýhanasynyń bas dárigeriniń mindetin atqarýshy Qaırat Jetibaev aıtty,- dep habarlaıdy QazAqparat tilshisi.
Spıkerdiń aıtýynsha, byltyr óńirle qaterli isik alǵash ret anyqtalǵan aýrýlar sany 1414-ti quraǵan. Bul 2019 jylymen salystyrǵanda 136 adamǵa kemigenin kórsetedi.
«Ólim kórsetkishine kelsek, oblys boıynsha ótken jyly 768 aýrý qaıtys bolyp, ólim kórsetkishi 100,0 myń adamǵa shaqqanda 67,4 qurady. Ótken jyly óńirimizde qaterli isikpen alǵashqy ret aýyrǵan 1414 adamnyń 58,2 paıyzy syrqattyń I jáne II satysynda ekeni anyqtaldy. Bul – osynsha naýqastyń qajetti emdi ýaqtyly alsa, jazylyp ketý múmkindigi joǵary degen sóz. Ólim-jitim kórsetkishin tómendetý úshin aýrýdy aldyn alý jáne aýrýdy erte satyda anyqtaý qajet»,- dedi Qaırat Jetibaev.
Oblysta ótken jyly obyr aýrýynyń úles salmaǵy boıynsha sút bezi qaterli isigi birinshi orynǵa shyqqan. Naqtyraq aıtsaq, 12,2 paıyzdy qurap otyr. Ekinshi orynda 10,0 paıyzben ókpeniń qaterli isigi, al asqazan qaterli isigi 8,5 paıyz, teri qaterli isigi - 7,9 paıyz, jatyr moıny qaterli isigi 5,2 paıyz, toq ishek, tik ishek qaterli isigi - 4,7 paıyzǵa aınalǵan.
Aıta keteıik, byltyr elimiz boıynsha 190 159 onkologııalyq aýrýmen esepte turady, onyń ishinde Respýblıka boıynsha 33 537 aýrý alǵashqy ret aýyrǵandar sanalady.
