Jambyl oblysynda BUU mandaty boıynsha «QazÚndi-2021» oqý-jattyǵýy ótip jatyr

TARAZ. QazAqparat - Jambyl oblysyndaǵy «Aısha-Bıbi» oqý-jattyǵý polıgonynda Qazaqstan men Úndistan áskerı qyzmetshileri arasynda «QazÚndi-2021» birlesken oqý-jattyǵýy ótýde. Bul týraly QazAqparat QR Qorǵanys mınıstrliginiń baspasóz zyzmetine silteme jasap habarlaıdy.

Oǵan Qazaqstannan «Ońtústik» óńirlik qolbasshylyǵynyń bólimsheleri jáne Úndistannyń qurama rotaǵa biriktirilgen áskerı kontıngenti qatysýda.

Birinshi kezeńde jeke quram jaýyngerlik daıarlyqtyń joǵary deńgeıine keltirý is-qımyldaryn pysyqtady. Halyqaralyq bólimshelerdiń áskerı qyzmetshileri daǵdarys aýdanyna marsh jasady. Qazirgi ýaqytta mejeli jerde rotalyq taktıkalyq qurama top bólimshelerdi jaýyngerlik úılestirýdi oryndady.

Oqý-jattyǵý sheńberinde qosymsha bólimsheniń áskerı qyzmetshileri barlaý-izdestirý jáne reıdtik is-qımyldar júrgizedi. Oqý-jattyǵýdyń sońǵy kezeńinde BUU-nyń mandatyna sáıkes daǵdarys aımaǵynda zańsyz qarýlanǵan toptardy oqshaýlaý jáne joıý josparlanǵan.

«QazÚndi-2021» birlesken oqý-jattyǵýy Qazaqstan men Úndistan qorǵanys mınıstrlikteri arasyndaǵy ekijaqty yntymaqtastyq jospary sheńberinde ótkizilýde. Ol aǵymdaǵy jyldyń 10 qyrkúıeginde aıaqtalady.

Oqý-jattyǵý sanıtarlyq-epıdemıologııalyq talaptardyń qatań saqtalýy arqyly ótýde. Oǵan qatysýshylar barlyq qajetti karantındik is-sharalardan, medıtsınalyq tekseristen ótip, PTR-test tapsyrdy.