Jambyl oblysynda búkil baǵyttar boıynsha jol ashyldy
TARAZ. QazAqparat - Jambyl oblysynda barlyq avtojoldar ashyldy, dep habarlaıdy QazAqparat.
Bul jaıynda Jambyl oblystyq tótenshe jaǵdaılar departamentiniń baspasóz qyzmeti Instagram paraqshasynda málim etti.
Eske sala keteıik, keshe aýa raıynyń nasharlaýyna baılanysty (qar, boran, joldyń nashar kórinýi) «Almaty-Tashkent-Termez» avtojolynyń 160-238 shaqyrymynda avtokóliktiń barlyq túriniń júrýine tyıym salynǵan edi.
Eske salaıyq, keshe Jambyl oblysynda qatty daýyl soǵyp, saldarynan Taraz qalasynda nysandardyń jartysynan kóbi elektr jaryǵynan ajyratyldy, elektr tasymaldaý jelileri isten shyqty, kóptegen ǵımarattyń shatyry julynyp, aǵashtar qulady, avtomobılder búlindi.
Daýyl saldarynan qazirgi ýaqytta birqatar aýdan jaryqsyz jáne kógildir otynsyz otyr.
Osy ýaqytqa deıin qarly boranda jolda qalyp qoıǵan 26 adam qutqaryldy.