Jambyl oblysynda brakonerler ákimshilik jaýapkershilikke tartylýda
TARAZ. QazAqparat - Jambyl oblysynda aǵymdaǵy jyldyń bes aıynda zańsyz balyq aýlaýmen, ony zańsyz satýmen jáne tasymaldaýmen baılanysty 28 quqyqbuzýshylyq deregi anyqtaldy, dep habarlaıdy QazAqparat tilshisi.
Jambyldyq polıtseıler balyq resýrstaryn jáne basqa da sý janýarlaryn, olardyń bólikteri men derıvattaryn paıdalanýǵa shekteý boıynsha júıeli jumystar júrgizýde. Jumystar nátıjesi týraly oblystyq Polıtsııa departamentiniń baspasóz qyzmeti habarlady.
«Tyıym salynǵanyna qaramastan, Talas ózeninde júıeli reıdtik is-sharalar barysynda 22 quqyqbuzýshy ustalyp, olarǵa qatysty QR ÁQBtK-niń 383-baby 1-bóligimen ákimshilik quqyqbuzýshylyq týraly hattama toltyryldy. Jalpy somasy 404 myń teńge aıyppul salyndy», - dedi Polıtsııa departamentiniń baspasóz qyzmetiniń jetekshisi Gúlsara Muhtarqulova.
Sondaı-aq, atalǵan kezeńde Taraz qalasynyń saýda oryndarynda zańsyz balyq satý men tasymaldaýdyń jolyn kesý boıynsha birqatar reıdtik is-sharalar ótkizilgen.
«Zańsyz balyq tasymaldaýmen jáne satýmen aınalysatyn 6 adam anyqtalyp, QR ÁQBtK-niń 389-baby 1-bóligimen ákimshilik is qozǵaldy. Olardan 194 keli balyq tárkilendi, is sotqa qaraý úshin jiberildi», - deıdi G. Muhtarqulova.
