Jambyl oblysynda boryshkerlerden 30 mln teńge óndirildi

TARAZ. QazAqparat – Jambyl oblysynyń polıtseıleri boryshkerlerden 30 mıllıonnan astam teńge óndirip aldy, dep habarlaıdy QazAqparat tilshisi.

Jambyl oblysynda «Boryshker-2021» jedel aldyn alý is-sharasy ótkizildi. Aktsııanyń maqsaty – «nóldik tózimdilik» qaǵıdatyn, jol berilgen buzýshylyq úshin jazanyń bultartpastyǵyn qamtamasyz etý, salynǵan ákimshilik aıyppuldy óndirip alýdyń tıimdiligin arttyrý.

«Sot oryndaýshylarynyń qaýlylary boıynsha aıyp turaǵyna boryshkerlerdiń 229 kóligi qoıyldy. Ákimshilik aıyppul qaýly zańdy kúshine engen kúnnen bastap 30 táýlik ishinde tólenýi tıis», – dedi Jambyl oblysy PD Ákimshilik polıtsııa basqarmasynyń bastyǵy Mámbet Smaıylov.

Aıta keteıik, aıyppuldy tóleý qajettigi týraly qaýlyny erikti túrde oryndaý merzimi ótkennen keıin on kún ishinde ol óńirlik sot oryndaýshylary palatasyna jiberiledi, olar múlikti, bank shotyn buǵattap, sondaı-aq boryshkerdiń shekaradan shyǵýyna shekteý qoıady.