Jambyl oblysynda borannan búlingen nysandardy demontajdaý bastaldy
Qarly boran men qatty jeldiń saldarynan Jańatas qalasyndaǵy 2 kópqabatty turǵyn úı, 5 áleýmettik, 9 sporttyq nysan zaqymdalǵan. Jaryq shamdary, elektr baǵanalary men júıeleri isten shyqqan. Aýdanǵa qarasty birqatar aýyldyq okrýgterdiń de kóshe jaryq shamdary men elektr jelileri, jeke turǵyn úılerdiń shatyry búlingen.
Sarysýda 18 brıgada, 23 tehnıka jaryqty qalpyna keltirý jumystaryna jumyldyrylǵan. 25 eldi mekenniń 11-inde elektr jelileri iske qosylyp, Jańatas qalasy boıynsha 97 kópqabatty turǵyn úıdiń barlyǵyna jaryq berildi. Jańatas qalasynyń ortalyq qazandyǵyna 4 qańtar kúni elektr qýaty berilip, 5 qańtar kúni jylytý júıesi iske qosyldy. Aýyz sý qalypty rejımde berilip tur. Aýdanda búgingi tańda barlyq baǵyttaǵy joldar ashylyp, kólik qatynasy retteldi.
Al, Talas aýdanynyń ortalyǵy Qarataý qalasynda tazalyq jumystary júrgizilip, kúl-qoqys shyǵarylyp jatyr. Aýdandaǵy elektr júıelerin qalpyna keltirý úshin 4 brıgada jumyldyryldy. Qarataý qalasyndaǵy kóp qabatty turǵyn úıler, sondaı-aq Kóktal, Tamdy aýyldyq okrýgterine tolyǵymen elektr qýaty qosyldy.
Qarataý qalasy boıynsha tabıǵı sıpattaǵy tótenshe jaǵdaıdan 10 kópqabatty turǵyn úı men qalalyq ákimdik ǵımaraty zardap shekken bolatyn. Búginnen bastap merdigerlerdiń tehnıkalary men qurylysshylary jasaqtalyp, demontaj jumystary bastaldy.
Aýdanda azyq-túlik ónimderine tapshylyq joq. Naýbaıhanalar qalypty rejımde jumys istep tur.
