Jambyl oblysynda bıyl sút bezi qaterli isiginen 49 adam qaıtys bolǵan
TARAZ. QazAqparat – Jambyl oblystyq onkologııalyq dıspanserdiń bas dárigeri Abaı Nurjanovtyń aıtýynsha, óńirde 7 201 naýqas onkologııalyq aýrýlarmen esepte tur. Onyń 1 110-ynyń derti jańadan anyqtalǵan, dep habarlaıdy QazAqparat tilshisi.
Bul dert boıynsha esepte turǵan naýqastardyń I-II satydaǵylary 59,8 paıyzdy quraǵan.
«Onkologııalyq aýrýlardyń ishinde sút bezi qaterli isigi 10,9 paıyzben ekinshi orynda tur. Al birinshi orynda ókpe – 11,6, odan keıingi kezekterde asqazan – 8,8, toq, tik ishek qaterli isigi 8,1 paıyzdy qurady. Jambyl oblysynda sút bezi qaterli isigimen 1459 áıel esepte tursa, onyń 121-i ishinde jańadan anyqtalǵan. Osy dertten bıyl jyl basynan beri qyryq toǵyz adam qaıtys bolǵan. Byltyr bul kórsetkish qyryq úsh adamdy quraǵan», - deıdi Abaı Nurjanov.
Sondaı-aq, onyń aıtýynsha sút bezi qaterli isigi álemde, onyń ishinde Qazaqstan Respýblıkasynda da ózekti másele bolyp otyr. Búginde bul dertti erte anyqtaý maqsatynda áıelderdi skrınıng tekserýden ótkizý memlekettik baǵdarlamasy iske asyrylýy áıelder densaýlyǵyn korǵaýda úlken áser etýde eken.
Statıstıkalyq derekterge júginsek, álemde jyl saıyn 1 250 000 sútbezi qaterli isigi tirkeledi eken. Qazaqstandaǵy kórsetkish 4600-5000 aralyǵynda ekenin aıtady mamandar.
