Jambyl oblysynda bıyl 57 órt tirkelip, 5 adam qaza tapty

TARAZ. QazAqparat – Jyl basynan beri Jambyl oblysynda 57 órt tirkelip, 5 adam qaza tapty. Órtten kelgen materıaldyq shyǵyn – 10 mln 480 myń teńge, dep habarlaıdy QazAqparat TJM resmı saıtyna silteme jasap.

Jambyl oblysy TJD memlekettik órt baqylaý basqarmasynyń aqparatyna sáıkes, órttiń 22%-dan astamy nemese 13-i turǵyn úı sektorynda tirkelgen. Júrgizilgen taldaýlar 7 jaǵdaı nemese oblys boıynsha órtterdiń jalpy sanynyń 12%-y otty abaısyz paıdalanýdan bolǵanyn kórsetken.

2022-2023 jylǵy jylytý kezeńi qarsańynda halyqtyń áleýmettik osal toptary turatyn 6 288 turǵyn úı esepke alyndy. Profılaktıkalyq jumystar barysynda 1 693 turǵyn úıde órt qaýipsizdigi talaptarynyń 2 981 zań buzýshylyǵy anyqtaldy. Negizinen elektrli tehnıkalyq jeliler men elektr jabdyqtary, avtonomdy jylytý júıelerin paıdalanýǵa baılanysty. Qazirgi ýaqytta órt qaýipsizdigi talaptary boıynsha 1 164 zań buzýshylyq joıyldy.

Gazdyń jáne janý ónimderiniń qaýipti kontsentratsııasyn anyqtaý úshin turǵyn úıge datchıkterdi ornatý jumystary jalǵasyp jatyr. 2022-2023 j.j. jylytý maýsymynda osal toptardyń turǵyn úılerinde 2 913 ýly gaz datchıkteri ornatyldy. Datchıkterdi ornatý jumysynyń eń joǵarǵy kórsetkishi Jýaly aýdanynda – 1 010, Shý aýdanynda – 1 000.

Sonymen birge, turǵyndardyń jáne demeýshilerdiń kómegimen gaz otyny jańadan tartylǵan abonentterdiń turǵyn úılerine 2022-2023 jyldardyń jylytý kezeńi qarsańynda 8 500 gaz taldaýyshtar ornatyldy.

Taraz qalasy, Talas, Jambyl, Jýaly, Baızaq, Merki, Qordaı aýdandarynyń ákimderi tarapynan turmysy tómen 266 jeke turǵyn úıdiń jylytý peshterine jóndeý, 402 turǵyn úıdegi murjalardy tazartý jáne 325 turǵyn úıdiń jaramsyz elektr symdaryn aýystyrý jumystary júrgizildi.

Foto: gov.kz