Jambyl oblysynda bıyl 40-tan astam aýyl kógildir otynmen qamtylady
Jambyl oblysynyń ákimi Berdibek Saparbaev óńirdegi eldi mekenderdi gazdandyrý máselesi boıynsha keńes ótkizdi. Bul másele ásirese Moıynqum, Sarysý jáne T.Rysqulov aýdandarynda aıryqsha mańyzǵa ıe.
Búgingi tańda oblystaǵy 371 eldi mekenniń tek 192-i (51,8 paıyzy) gazdandyrylyp, barlyǵy 900 myńǵa jýyq adam ǵana gazben qamtamasyz etilgen. 2020-2027 jyldary qalǵan 179 eldi mekendi gazben qamtý kózdelip otyr.
«Men oblystyń aýdandaryna jasaǵan jumys saparlarymnyń barysynda «Bizge gaz qashan keledi?» degen suraqty jıi estımin. Bul ásirese Moıynqum jáne Sarysý aýdandaryna qatysty. T.Rysqulov aýdanynda bes aýyldy gazdandyrý boıynsha josparlanǵan jumystar áli de qolǵa alynbaı keledi», - dep atap ótti oblys ákimi.
Energetıka jáne turǵyn úı-kommýnaldyq sharýashylyq basqarmasynyń basshysy Qudaıbergen Qorǵanbaevtyń aıtýynsha, aǵymdaǵy jyldyń sońyna deıin 42 eldi mekenge gaz berý josparlanǵan. Osylaısha, oblystyń taǵy 94 myń turǵyny gazben qamtylmaq.
«Aldaǵy jeti jylǵa arnalǵan jospar boıynsha segiz aýdandaǵy qurylys jumystarynyń jalpy quny 45 mlrd teńgeni quraıdy. 2019 jyly 6,4 mlrd teńge, 2020 jyly 16,2 mlrd teńge bólingen. Keler jyly 4,6 mıllıard teńge qarastyrylady.
Qurylys jumystaryn aıaqtaý úshin taǵy 18 mıllıard teńge qajet», - dedi basqarma basshysy.
Oblys ákimi halyq sany 50-den az eldi mekenderdi gazben qamtamasyz etý tıimsiz ekendigine nazar aýdardy. Q.Qorǵanbaevtyń aıtýynsha, oblysta halqy 50 adamǵa jetpeıtin 43 eldi meken bar.
«Biz eldi mekenniń bolashaǵy bar ma, joq pa, soǵan nazar aýdarýymyz kerek. Osyǵan baılanysty oblysty gazdandyrýdyń 2020-2027 jyldarǵa arnalǵan josparyn qaıta qarap, ondaı halqy az aýyldardy alyp tastaý qajet. Óz kezeginde aýdan ákimderi bul jaǵdaıdy halyqqa túsindirip, únemi aqparattyq jumystar júrgizip otyrýy kerek», - dep atap ótti aımaq basshysy.
Búgingi tańda Sarysý aýdanynda jergilikti turǵyndardyń 16 paıyzy turatyn tórt eldi mekenge ǵana gaz tartylǵan. Qazir aýdanda eki nysannyń qurylysy júrip jatyr. Sonymen qatar, aýdannyń 14 eldi mekeninde endi ǵana gaz qubyryn tartý jumystary bastalǵan. Bul jobalar aıaqtalǵannan keıin 40 myńǵa jýyq adam kógildir otynǵa qol jetkizedi.
Oblys ákimi Sarysý aýdanynyń basshylyǵyna óńirdiń iri kásiporyndary men tabysty túlekterdiń arasynan demeýshiler tartý arqyly gazben qamtamasyz etýge qarajat tabýdy tapsyrdy.
T.Rysqulov aýdanynda bıyl bes aýylǵa gaz qubyryn tartý josparlanǵan bolatyn. Jobalardyń jalpy quny 1,1 mıllıard teńgeni quraıdy. Ókinishke oraı, qurylys jumystary áli bastalmaǵan. Aımaq basshysy bul jumysty jedeldetýdi tapsyrdy. Al, Moıynqum aýdanynda áli kúnge deıin birde-bir aýylda gaz joq.
«Bul eń úlken aýdandy tolyqtaı gazdandyrý tym qymbatqa túseri sózsiz. Moıynqum aýdanynda jyl saıyn turǵyndardyń kóshýi baıqalatyn, turǵyndar az qonystanǵan aýyldar kóp. Sondyqtan, eger ol jaqqa gaz aparatyn bolsaq, ázirge tek magıstraldy gaz qubyrlary bar Shý aýdanymen shekarada ornalasqan aýyldarǵa ǵana, sondaı-aq aýdan ortalyǵyna tartý kerek»,- dedi oblys ákimi.
