Jambyl oblysynda bıyl 40 medıtsınalyq nysan salynady
TARAZ. QazAqparat - Jambyl oblysynda 2019 jyly 40 medıtsınalyq nysannyń qurylysy júrgiziledi. Onyń ishinde 1 dárigerlik ambýlatorııa, 7 feldsherlik-ambýlatorııalyq, 32 medıtsınalyq pýnkt boı kóteredi, dep habarlaıdy QazAqparat.
Byltyr óńirde 39 medıtsınalyq nysan paıdalanýǵa berilgen. Onyń 29-y memlekettik-jekeshelik áriptestik aıasynda, 9-y jergilikti bıýdjet esebinen salynsa, 1-i satyp alynǵan. Bul qurylys jumystaryna 1325,0 mln teńge bólingen. Al, bıyl 40 nysan salynady dep kózdelse, 2020 jyly - 25 nysan qurylysynyń júrgizilýi josparlanýda.
«Qazirgi tańda saladaǵy qurylys jumystary qarqyndy júrgizilýde. Ótken jyly 6 densaýlyq saqtaý nysandaryn kúrdeli jóndeýden ótkizýge 111,5 mıllıon teńge kóleminde qarjy qarastyrylyp, ıgerildi. Onkologııalyq dıspanserdiń qurylysyna respýblıkalyq bıýdjetten 250,0 mıllıon teńge, jergilikti bıýdjetten 4,5 mıllıon teńge qarastyrylǵan. Dıspanserdiń iske asyrylý merzimi 2018-2020 jyldarǵa belgilengen», - deıdi oblystyq densaýlyq saqtaý basqarmasynyń basshysy Marat Jumanqulov. Ol ótken jyly óńirde ana ólimi 34,4 paıyzǵa, náreste ólimi 7,7 paıyzǵa tómendegenin tilge tıek etti.
Aıta keteıik, qazirgi tańda jalpy Jambyl oblysy boıynsha barlyǵy 396 medıtsınalyq uıym jumys isteıdi. Onyń ishinde 30 aýrýhana, 356 ambýlatorlyq emhana, 4 sanatorıı, 1 reabılıtatsııalyq ortalyq jáne taǵy basqalar bar.
