Jambyl oblysynda bıyl 11,7 km jylý jelileri jóndeýden ótedi
Jambyl oblystyq Energetıka jáne turǵyn úı-kommýnaldyq sharýashylyq basqarmasynyń basshysy Qudaıbergen Qorǵanbaevtyń aıtýynsha, óńirde jylytý maýsymy bıyl 12 sáýirde aıaqtalyp, uzaqtyǵy 183 táýlikti quraǵan. Jalpy, 9 jylý energetıka kesheni jylytý maýsymy kezeńinde 1 mıllıon 63 myń gıgakalorıı jylý energııasyn óndirip, 121 mıllıon 393 myń tekshe metr gaz tutynylǵan. Bul ótken jylmen salystyrǵanda 51,8 myń gıgakalorııǵa jáne 6,0 myń tekshe metrge kóp.
Jalpy, óńirdegi 9 jylý energetıka kesheni men 593 avtonomdy qazandyq 1737 áleýmettik nysan men kópqabatty 1650 turǵyn úıge jylý beredi. Tıisti kezeńde jylý kózderi men ınjenerlik ınfraqurylym jelilerinde 1-sıpattaǵy avarııalyq jaǵdaılar men tehnologııalyq aqaýlar tirkelmegen.
«2021 jyly 156 áleýmettik nysannyń qazandyqtaryn gazdandyrý is-sharalar jospary bekitilgen bolatyn. Búgingi kúnge 50 nysannyń qazandyqtary gazdandyryldy. Bul jumystardy ári qaraı jalǵastyrý úshin 2025 jylǵa deıingi Jol kartasy bekitilgen bolatyn. Soǵan sáıkes, birinshi kezekte gazdandyrýdy qajet etetin 195 qazandyqtyń tizimi jasaqtalǵan. Bıyl 36 nysan josparlanyp, búgingi kúnge onyń 25-iniń jobalyq-smetalyq qujattary ázirlengen.
Aldaǵy jylytý maýsymyna Taraz qalasynyń jylý jelilerin sapaly daıyndaý úshin bıyl tolyq 30 kúnge ystyq sýdyń berilýin ýaqytsha toqtatyp, gıdravlıkalyq synaý jumystaryn júrgizemiz», – dedi basqarma basshysy.
Aıta keteıik, buǵan deıin Jambyl oblysyn úsh jylda 100 paıyz aýyzsýmen qamtamasyz etý josparlanyp otyrǵanyn jazǵan bolatynbyz.