Jambyl oblysynda bir jylda 100-den astam sport nysany ashylǵan
TARAZ. QazAqparat – Jambyl oblysynda ótken jyly oblysta 13 dene shynyqtyrý-saýyqtyrý kesheni men 92 sport alańshasy paıdalanýǵa berilgen, dep habarlaıdy QazAqparat tilshisi.
Óńirde sportpen júıeli túrde aınalysatyn azamattardyń úlesi 32,2 paıyzǵa jetti. Bıyl óńirde taǵy 8 dene shynyqtyrý-saýyqtyrý kesheni boı kótermek.
«Eń bastysy – sport keshenderiniń sany emes, olardy tıimdi paıdalaný. Biz sport nysandardyń júktelýi men jumys rejımin qadaǵalaımyz. Salaýatty ómir saltyn ustanatyndardyń barlyǵy úshin sport keshenderiniń esigi árdaıym ashyq bolýy tıis«, - dep atap ótti halyqqa esep berý kezdesýinde oblys ákimi Berdibek Saparbaev.
Ótken jyly mádenıet salasy da nazardan tys qalǵan joq. Baızaq jáne Jambyl aýdandarynda bes jańa mádenıet úıi men aýyldyq klýbtar salyndy. Onlaın formatta 12 myńnan astam mádenı-buqaralyq is-shara ótti.
Mádenıet salasyndaǵy 1,8 myń qyzmetkerdiń jalaqysy 35 paıyzǵa, sport salasynyń 1 myńnan astam qyzmetkeriniń jalaqysy 25 paıyzǵa artty.
Al, týrızm nysandary 37-den 65-ke deıin, týrıstik marshrýt sany 22-den 45-ke ósken. «Tekturmas» etno-tarıhı kesheni qala qonaqtary men turǵyndaryn qyzyqtyratyn orynǵa aınala bildi. Búginde jańǵyrtýdyń ekinshi kezeńi boıynsha jumys júrgizilýde, ol bıyl aıaqtalmaq.
«Týrızm salasyn damytýǵa baǵyttalǵan 10,7 mıllıard teńge kóleminde 8 ınvestıtsııalyq joba iske asyrylýda. 450 jańa jumys orny ashylady», - dedi Berdibek Saparbaev.
Respýblıkalyq mańyzy bar avtomobıl joldarynyń boıynda jol boıy servısiniń 63 nysany salynǵan desek, onyń 35-i ulttyq standart talaptaryna sáıkes keledi.
