Jambyl oblysynda bir táýlikte birneshe órt tirkeldi
TARAZ. QazAqparat - Jambyl oblysynda birneshe kúnnen beri uıytqyp soqqan jel turǵyndarǵa biraz qolaısyzdyqtar týdyrdy. Osyǵan oraı oblysta órt oqıǵalary da jıiledi, dep habarlaıdy QazAqparat tilshisi.
Oblystyq tótenshe jaǵdaılar departamenti órt sóndirý jáne avarııalyq-qutqarý jumystary qyzmetiniń qoǵammen baılanys toby bergen málimetterge súıensek, 31 mamyr kúni saǵat 11.06-da Shý aýdany Dalaqaınar aýylyndaǵy tórt kórshiles turǵyn úılerdiń qoralary jáne shóphanasy otqa oranǵan. Oqıǵa ornyna Shý aýdany №19 jáne Shý qalasy №5 órt sóndirý bólimderinen barlyǵy 5 adamnan quralǵan jeke quram men 2 órt sóndirý avtokóligi barady. Órt sóndirýshiler qyzyl jalyndy 1 saǵat 45 mınýtta tolyq sóndirgen. Órttiń jalpy aýdany 120 sharshy metrdi quraǵan. Órt kezinde úsh bas mal jáne bir úıdiń qorasy men shóphanasy túgeldeı órtenip ketken.
Sonymen qatar, saǵat 16.35-te T.Rysqulov aýdany Aqyrtóbe aýylyndaǵy turǵyn úıdiń aýlasynda shóp qorany órt shalǵan. Jalyndy aýyzdyqtaýǵa 5 órt sóndirýshi-qutqarýshy men 2 órt sóndirý tehnıkasy jumyldyrylyp, tilsiz jaý 2 saǵattan astam ýaqytta tolyǵymen sóndirilgen. 100 sharshy metr aýmaqty qamtyǵan órttiń saldarynan shóphana men ondaǵy 150 túk shóp janyp ketken.
Kelesi órt oqıǵasy saǵat 17.51-de Jambyl aýdany Asa aýylyndaǵy turǵyn úıdiń aýlasynan shyqqan. Munda da shópke órt tıgen. 80 sharshy metr aýmaqty sharpyǵan qyzyl jalyndy 2 órt sóndirý avtokóligi men 6 adamnan quralǵan jeke quram 1 saǵattan astam ýaqytta sóndirgen. Órt saldarynan 250 túk nemese 5tonna shóp joıylǵan.
Sondaı-aq, 1 maýsym kúni saǵat 02.58-de Taraz qalasynyń Kókterek kóshesindegi turǵyn úıdiń aýlasyndaǵy monsha otqa oranǵan. Órt sharpyǵan aýdan kólemi – 30 sharshy metr. Oqıǵa ornyna Taraz qalasy №3 órt sóndirý bóliminen 2 órt sóndirý avtokóligi men 6 TJ qyzmetkeri órtti 23 mınýtta aýyzdyqtaǵan.
Sondaı-aq, dál osy kúni saǵat 03.51-de Merki aýdany Aspara aýylynyń janynda, Almaty-Tashkent tasjolynyń 280 shaqyrymynda halyq tutynatyn taýarlar tıelgen júk avtokóliginiń tirkemesi órtke oranǵan. Órt sóndirýshiler órtti 1 saǵattan astam ýaqytta joıǵan.
Buǵan deıin Jambyl oblysynda demalys aımaǵy órtenip jatqanyn habarlaǵan bolatynbyz.
