Jambyl oblysynda bir otbasynan úsh bala koronavırýs juqtyrdy
TARAZ. QazAqparat – Jambyl oblysynda 1-12 jas aralyǵyndaǵy 6 bala koronavırýs juqtyrdy, dep habarlaıdy QazAqparat óńir ákimdiginiń resmı saıtyna silteme jasap.
25 mamyr kúni Jambyl oblysynda koronavırýs ınfektsııasyna shaldyǵýdyń jańadan 51 jaǵdaıy tirkelgen bolatyn.
Taraz qalasynda anyqtalǵan 49 oqıǵanyń 48-i – naýqastarmen baılanysta bolǵandar. Bir jaǵdaı qalanyń 69 jastaǵy turǵynynan anyqtaldy. Ol JRVI belgilerimen ınfektsııalyq statsıonarǵa jatqyzylǵan.
Naýqastardyń qatarynda 1 jastan 12 jasqa deıingi kámeletke tolmaǵan 6 bala bar. Olardyń arasynda, úsh bala – bir otbasynan.
«Laboratorııalyq zertteýler nátıjelerimen COVID-19 bir otbasynyń tórt múshesinde, onyń ishinde 2005, 2008 jáne 2016 jyly týǵan balalarda rastaldy. Olar buǵan deıin dert juqtyrǵan týysymen baılanysta bolǵan. Sonymen qatar, T.Rysqulov aýdanynda eki jaǵdaı anyqtaldy. Aýrý 1991 jyly týǵan er adamda jáne 1993 jyly týǵan júkti áıelden tabyldy. Ekeýi de naýqaspen baılanysta bolǵan tulǵa retinde buǵan deıin oqshaýlandyrylǵan», - delingen habarlamada.
Barlyq naýqastar juqpaly aýrýlar aýrýhanasyna jetkizildi. Olarmen baılanysta bolǵandar anyqtalyp, karantınge alyndy. Oshaqtarda dezınfektsııalyq óńdeý sharalary júrgizildi.
Búginge deıin Jambyl oblysynda koronavırýs indetiniń 343 jaǵdaıy tirkeldi. Olardyń 173-i saýyǵyp, dárigerlerdiń baqylaýyndaǵy úı karantınine shyǵaryldy.
