Jambyl oblysynda bir otbasy músheleriniń ómirin qıǵan kúdikti ustaldy
TARAZ. QazAqparat - Jambyl oblysynyń Shý aýdanynda polıtseıler adam óltirý deregimen sotqa deıingi tergep-tekserý júrgizip jatyr, dep habarlaıdy QazAqparat tilshisi oblystyq ishki ister departamentine silteme jasap.
«Jergilikti sharýa qojalyǵynyń 48 jastaǵy basshysyn jáne onyń 17 jastaǵy qyzy men 16 jastaǵy ulyn óltirdi degen kúdikti ustaldy», - deıdi vedomstvo ókilderi.
Aldyn ala málimetterge qaraǵanda, Shý aýdanynyń Dalaqaınar kentinen 12 shaqyrym jerdegi, taýly aımaqta ornalasqan sharýa qojalyǵynyń basshysy bıyl Shý qalasynyń 42 jastaǵy turǵynyn jumysqa alady. Aýqatty otbasynyń berekesin kóre almaǵan jumysshy olarǵa qastandyq jasaǵan.
«Er adamnyń denesi aýladan, qyzynyń múrdesi bólmelerdiń birinen, al ulynyń máıiti úıden 150 metrdeı jerdegi butanyń arasynan tabyldy. Ustalǵan jumysshydan óltirgen fermerge tıesili mototsıkl, noýtbýk, mobıldi telefondar jáne aqshalar tárkilendi», - dep málimdedi Jambyl oblystyq ІІD baspasóz qyzmeti.
Kúdikti aıybyn moıyndaǵan, ol Shý aýdandyq ishki ister bóliminiń tergeý ızolıatoryna qamaldy.
QR Qylmystyq kodeksiniń 99-babynyń («Adam óltirý») 2-bóliginiń 1) tarmaǵy (eki nemese odan kóp adamdy óltirý), 14) tarmaǵy (kórineý kámeletke tolmaǵan adamdy óltirý) boıynsha sotqa deıingi tergep-tekserý júrip jatyr.
