Jambyl oblysynda bir aıda 60 qarý tárkilendi
Jambyl oblysynyń Polıtsııa departamenti qańtar oqıǵasy kezinde urlanǵan, zańsyz saqtalǵan qarýdy izdeý jáne tárkileý jumystaryn jalǵastyryp keledi. Osy maqsatta sáýir aıynyń sońyna qaraı oblysta «Qarý» jedel-aldyn alý is-sharasy ótken bolatyn.
Polıtsııa qyzmetkerleri jedel-izdestirý sharalary kezinde Tarazdaǵy «Solnechnyı» ıininen qarý-jaraq pen oq-dári salynǵan polıpropılen paketin tapqan. Onda Jambyl oblysy PD qoımasynan urlanǵan 5,45 mm kalıbrli «AKS-74» avtomaty, 12 mm kalıbrli «IJ-54» markaly eki uńǵyly ańshy myltyǵy, 16 mm kalıbrli «IJ-ZK» markaly bir uńǵyly ańshy myltyǵy, «IJ-18EM» 16 mm kalıbrli tegis uńǵyly ańshy myltyǵy, 16 mm kalıbrli «IJ-58» markaly bir uńǵyly sholaq ańshy myltyǵy bolǵan.
Atalǵan derekke qatysty QR Qylmystyq Kodeksiniń 287-baby 3-bóliminiń «Qarýdy, oq-dárilerdi, jarylǵysh zattar men jarylǵysh qurylǵylardy zańsyz satyp alý, berý, ótkizý, saqtaý, tasymaldaý nemese alyp júrý» boıynsha sotqa deıingi tergeý amaldary bastaldy.
«Іs-sharanyń 5 kúninde polıtseıler zańsyz aınalymnan 54 qarý, 448 oq-dári, 1 jaryq-shý granatasyn, 9 arnaıy quraldy tárkiledi. Alynǵan barlyq quraldarǵa sot-ballıstıkalyq saraptamalar taǵaıyndaldy. Polıtsııa qyzmetkerleri qarý ıeleriniń turǵylyqty jeri boıynsha, sondaı-aq shalǵaıdaǵy 704 sharýa qojalyǵyna tekserý jumystaryn júrgizdi.
Jedel-aldyn alý sharasy barysynda 21 adam ákimshilik jaýapkershilikke tartyldy, onyń ishinde qarýdy saqtaý erejelerin buzýdyń 15 deregi, qarýdy qaıta tirkeýdi buzýdyń 6 faktisi anyqtaldy. Osylaısha, sáýir aıynda zańsyz aınalymnan 60 qarý men 1 183 oq tárkilendi», - dedi Jambyl oblysy PD bastyǵynyń orynbasary, polıtsııa polkovnıgi Nurjan Rahmetýllaev.
Buǵan deıin Tarazda qaraýsyz ǵımarattan qarý-jaraq pen oq-dáriler tabylǵanyn jazǵan bolatynbyz.