Jambyl oblysynda bir aptada aýrýhanadaǵy naýqastar sany 16 paıyzǵa azaıdy
TARAZ. QazAqparat – Jambyl oblysynda búginde koronavırýstyń taralýyna qarsy qabyldanǵan sharalar oń nátıje berýde. Atap aıtar bolsaq, aýrýdy turaqtandyrý úrdisi baıqalyp, emdelgen adamdar sany kóbeıip, jedel járdem shaqyrtýlar sany azaıǵan, - dep habarlaıdy QazAqparat tilshisi.
Oblys ákimi baspasóz qyzmetiniń habarlaýynsha, 24 shildedegi jaǵdaı boıynsha Jambyl oblysynda koronavırýs ınfektsııasynyń 3122 jaǵdaıy tirkelgen.
«Bir apta ishinde aýrýhanaǵa jatqyzylǵan naýqastar sany 16 paıyzǵa azaıdy. Koronavırýstan emdelip shyqqandar sany – 1432-ge jetti, bul naýqastardyń jalpy sanynyń 45 paıyzy. Jalpy tósek syıymdylyǵy 715-ten 1780-ge deıin artty. Ýaqytsha statsıonarlardaǵy tósek júktemesi 33 paıyzǵa, al reanımatsııa bólimshelerinde 13 paıyzǵa azaıdy. Qazirgi ýaqytta COVID-19 jáne pnevmonııamen aýyratyn naýqastardy emdeý úshin statsıonarlyq tósek oryndary jetkilikti»,-delingen habarlamada.
Sondaı-aq, aýrýhana qyzmetkerlerine arnalǵan jeke qorǵanys quraldarynyń rezervi qalyptastyryldy.
Tósek qoryn qajetti qural-jabdyqtarmen jabdyqtaý jumystary júrgizilýde. Qoldanystaǵy 146 jasandy tynys alý apparatynan bólek, qosymsha 250 ottegi kontsentratory, 62 jasandy tynys alý apparaty (olardyń 19-y jetkizilgen), 270 ottegi kontsentratory (200-i jetkizilgen) satyp alynady.
Jedel járdem brıgadalarynyń sany 68-den 92-ge jetti desek, 18-23 shilde aralyǵynda jedel járdemdi shaqyrtýlar sany 10 paıyzǵa tómendegen.
Óńirde naýqastardy dári-dármektermen qamtamasyz etý máselesi de árdaıym baqylaýda. Densaýlyq saqtaý basqarmasy «SK-Farmatsııa» JShS-niń óńirdegi ókilderimen turaqty kelissózder júrgizýde. Jalpy somasy 1,2 mlrd. teńgege oblysqa dári-dármek satyp alýǵa qosymsha ótinimder jasalsa, búginde 471 mln. teńgege preparattar jetkizilgen. Medıtsınalyq mekemelerge 56,7 myń tabletka jáne 75,3 myń qutydaǵy antıbıotıkter, 13,1 myń antıkoagýlıanttar shprıtsteri, 16,5 myń vırýsqa qarsy preparat tabletkalary, 2,5 myń bótelke dene qyzýyn túsiretin dáriler kelip tústi.
Sondaı-aq, Ózbekstannan dári-dármek satyp alýǵa jergilikti bıýdjetten aqsha bólinýde. Búgingi tańǵa 10,2 mln. teńgege dári-dármektiń kezekti partııasy keldi. Buǵan deıin 24 mıllıon teńgeniń dári-dármekteri kórshi memleketten jetkizilgen bolatyn.
Bıznes-qaýymdastyǵy da muqtaj top ókilderine koronavırýs saldaryn eńserýge kómektesýde. Kásipkerler dári-dármekter men medıtsınalyq maqsattaǵy buıymdardy satyp alýǵa aqsha jınady. Demeýshiler esebinen 28 jasandy tynys alý apparaty jáne 82 ottegi kontsentratory satyp alyndy.
«Gýmanıtarlyq kómek aıasynda Katar, Qytaı, Ózbekstan, Túrkııa, Birikken Arab Ámirlikterinen jeke qorǵanys quraldary, ekspress-testter, antıseptıkalyq jáne dári-dármekter jetkizildi. Oblysta PTR zertteýge arnalǵan 6 zerthana bar.
Sımptomsyz emdelýshiler men koronavırýstyq ınfektsııanyń jeńil belgileri bar naýqastardy tolyq esepke alý, úıde medıtsınalyq kómek kórsetý úshin 214 mobıldi top quryldy. Olardyń quramyna dárigerler, medbıkeler jáne áleýmettik qyzmetkerler engen. Memlekettik organdardyń 78 qyzmettik kóligi ýaqytsha mobıldi brıgadalarǵa berildi»,-delingen vedomstvo málimdemesinde.
