Jambyl oblysynda bilim nysandary 100 paıyz vıdeokameramen qamtylady
TARAZ. QazAqparat - Jambylda bıyl bilim nysandary 100% paıyz vıdeobaqylaý kameralarymen jabdyqtalady. Bul týraly «Nur Otan» partııasy Jambyl oblystyq fılıalynyń XXIV kezekten tys konferentsııasynda aıtyldy, dep habarlaıdy QazAqparat tilshisi.
Konferentsııada baıandama jasaǵan oblys ákiminiń birinshi orynbasary Bekbolat Orynbekov Memleket basshysy N.Nazarbaevtyń «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty 2018 jylǵy 5 qazandaǵy Joldaýynyń Jambyl oblysynda iske asyrý barysy týraly málimdedi.
Bekbolat Serikbekulynyń aıtýynsha, Joldaýǵa sáıkes, Jambyl oblysynda 1 qańtardan bastap, 42 myń teńgeden tómen jalaqy alatyn bıýdjettik uıymdardaǵy 39 626 qyzmetkerdiń jáne jeke kásiporyndardaǵy 21 myń jumyskerdiń jalaqysy kóterilgen. 2000-ǵa jýyq kásiporynda eńbek etetin 50 myńǵa tarta adamnyń jalaqysy orta eseppen 20 paıyzǵa ósken.
Joldaýdaǵy tapsyrmaǵa saı óńirdegi bilim nysandaryn beınekameramen jabdyqtaý jumysy byltyr 97 paıyzǵa oryndalsa, bıyl bul kórsetkish 100 paıyzǵa jetpek.
«Ótken jyldyń aıaǵyna deıin elimizde 8-16 jas aralyǵyndaǵy oqýshylar úshin 1000 mektepte ІT synyby ashylyp, onda jalpy sany 450 myń balany oqytý josparlanǵan bolsa, búgingi kúnge deıin Jambyl oblysynda 14 ІT synyp, 1 ІT-lıtseı ashylǵan. Bundaı ıgi sharalar aldaǵy ýaqytta da jalǵasyn tabatyn bolady», - dedi B.Orynbekov.
Aıta ketý kerek, konferentsııanyń kún tártibindegi ekinshi jáne úshinshi máseleler - «Nur Otan» partııasynyń 20 jyldyǵy. Jasampazdyq jáne áleýmettik damý kezeńi» jáne partııanyń 2030 jylǵa deıingi Baǵdarlamasy jobasynyń negizgi erejeleri týraly partııa oblystyq fılıaly tóraǵasynyń birinshi orynbasary Erqanat Manjýov habarlama jasady. Ol óz sózinde partııa 20 jyldyq tarıhynda elimizde atqarylǵan qyrýar isterdiń basy-qasynda bolyp, 20 jyldyq qalyptasý kezeńinde óziniń myqty qurylymdary men berik strategııalyq maqsattary arqasynda elimizdegi eń bedeldi, eń iri saıası kúshke aınalǵanyn atap ótti.
