Jambyl oblysynda Bıler keńesi quryldy

Aýdan ákimdigi ókilderiniń habarlaýynsha, Bıler keńesin qurý jónindegi májiliske aýdandyq sot tóraǵasy B.Múlkibaev, Jýaly aýdany ákiminiń orynbasary E.Jańabaev, aýdandyq ardagerler keńesiniń tóraǵasy E.Amambekov qatysty. Sonymen qatar basqosýǵa keńes ókilderi, medıatorlar, aýdan aqsaqaldary men BAQ ókilderi qatysty.

Jıynǵa qatysýshylar Bıler keńesin quryp, onyń múshelerin saılady.

«Bıler keńesin qurýdaǵy maqsat - turǵyndar arasynda paıda bolǵan daýlardyń sotqa deıin sheshilýine yqpal etý. Keńestiń bedeldi músheleri halyq arasynda týyndaǵan janjaldardy, talas-tartystardy kóne dástúr negizinde sheshýge yqpal etpek. Bul Elbasynyń jaqynda ǵana jarııalanǵan «Uly dalanyń jeti qyry» atty eńbeginde kóterilgen máselelermen úndes keledi. Atalmysh eńbekte kezinde halqymyzdy nebir qıyn-qystaý kezeńderden alyp shyǵyp, osy kezde umytylýǵa shaq qalǵan kóne dástúrlerdi jańǵyrtý qajettigi aıtylady»,-dedi E.Amambekov.

Aýdandyq sot tóraǵasy B.Múlkibaevtyń sózinshe, Bıler keńesin qalyptastyryp ony damytý ıdeıasy kóshpendi halyqtyń kóne dástúriniń jalǵasy bolmaq.

Bıler keńesi kóshpendi qazaq halqynyń qoǵamynda mańyzdy máselelerdi sheshetin organdardyń biri bolǵan. Bıler ol ýaqytta jekelegen máseleler boıynsha tıisti sheshim qabyldap qana qoımaı, bir mezgilde sot, prokýratýra jáne advokattyń qyzmetin atqaryp, ádildiktiń ústemdik qurýyna uıtqy bolǵan. Bılerdiń sheshiminiń ádildigine eshkim kúmán keltirmegen jáne oǵan qatysty tıisti úkim sol sátte oryndalatyn bolǵan. Sondyqtan da halyq qandaı da bir zańsyz áreketke barýdan qaımyqqan. Óıtkeni aqsaqaldar oǵan qatysty qandaı da bir qatań sheshim shyǵaratyn bolsa sol sátte júzege asady»,-dedi B.Múlkibaev.

Jýaly aýdandyq sotynyń baspasóz qyzmetiniń habarlaýynsha, májilis qorytyndysy boıynsha, aqsaqaldarǵa aýzy «dýaly» degen azamattardan aýyldarda bıler keńesin qurý usynyldy.

Osyǵan deıin Taraz qalasynyń óziniń "Jasyl beldeýi" bolatyndyǵy týraly habarlaǵanbyz.