Jambyl oblysynda beıitterdiń qorshaýyn urlaǵandar ustaldy
TARAZ. QazAqparat – Jambyl oblysynyń Talas aýdanynda belgisiz bireýler beıitterdiń temir qorshaýyn urlaǵan, dep habarlaıdy QazAqparat.
Oblystyq polıtsııa departamentiniń baspasóz qyzmetiniń habarlaýynsha, Talas aýdandyq polıtsııa bólimine Qarataý qalasynyń 38 jastaǵy turǵyny týystarynyń beıitindegi shoıyn qorshaýlardy buzyp, urlap ketkendigi týraly aıtyp shaǵymdanǵan.
«Aýdandyq polıtsııa qyzmetkerleri qylmysqa qatysy bar 25 jáne 19 jastaǵy Qarataý qalasynyń turǵyndaryn anyqtady. Onyń biri buryn jerleý bıýrosynda jumys istegen. Kúdiktiler zıratqa barǵanda birinshi kezdesken shoıyn qorshaýdy buzyp, bólshektep qolarbamen alyp ketken»,-delingen vedomstvo habarlamasynda .
Kúdiktiler temir synyqtaryn satqan aqshany sol kúni jumsap tastaǵan. Jeńil qarjyǵa dánikken olar oqıǵa ornyna qaıta kelip, vandaldyq áreketterin jalǵastyrǵan. Tergeý jumystary barysynda kúdiktilerdiń osyǵan uqsas ózge de qylmastarǵa qatysy bar ekendigi anyqtalǵan. Ustalǵandar kinásin moıyndady.
Atalǵan derekke qatysty qazirgi ýaqytta QR QK-niń 188-baby 2-bólimi 1-tarmaqshasymen sotqa deıingi tergeý amaldary júrgizilýde.
