Jambyl oblysynda bes jylda 140 mln túp kóshet otyrǵyzylady
TARAZ. QazAqparat – Jambyl oblysynda orman ekpelerin arttyrýǵa basa kóńil bólinýde, dep habarlaıdy QazAqparat tilshisi.
Búgingi tańda Jambyl oblysyndaǵy memlekettik orman qorynyń jalpy kólemi 4,4 mln gektardy qurasa, onyń orman aǵashtary kómkergen jeri - 2,4 mln gektar.
Bul degenimiz orman qory oblys jer aýmaǵynyń 30,8 paıyzyn, al ormandy jerler 15,47 paıyzyn alyp jatyr degen sóz.
Al osynaý aýmaqty qorý, kúzetý jumysyn orman sharýashylyǵy mekemelerinde barlyǵy 931 qyzmetkerler atqarýda eken.
Ásirese, bul sala mamandaryormandy molyqtyrý jumystaryna basa mán berip keledi.
Ótken jyly orman ekpeleri 3054 gektarǵa otyrǵyzylyp, 2750 gektarǵa sekseýildi tuqymynan sebý jumystary júrgizilgen.
Jambyl oblysy ákimdigi tabıǵı resýrstar jáne tabıǵatty paıdalanýdy retteý basqarmasynyń orman sharýashylyǵy jáne erekshe qorǵalatyn tabıǵı aýmaqtardy qorǵaý bóliminiń basshysy Danııar Bashanov ótken jyldyń kúz aıynda tuqymbaqtar kóleminiń artqanyn tilge tıek etti.
«Ótken jyly mekemelerde jospar boıynsha 49 gektarǵa qaraǵash, júzgen, sekseýil kóshetterinen tuqymbaq jasalyp, onda qaraǵash, sekseýil kósheti ósirildi. Josparǵa sáıkes jalpy aýmaǵy 4,4 gektardy quraıtyn tuqymbaqqa 25 000 ártúrli qylqan japyraqty aǵash otyrǵyzyldy. Kúz aıynda sekseýil tuqymbaǵy 44 gektarǵa artyp, barlyq tuqymbaq kólemi 93 gektardy qurady»,-deıdi bólim basshysy.
Memleket basshysy Qasym-Jomart Kemeluly Toqaev ótken jylǵy Joldaýynda dál osy ormandy molyqtyrý, ıaǵnı orman ekpesin molaıtý tapsyrmasy aıasynda basqarma tarapynan arnaıy jospar da qurylypty.
«Memleket basshysynyń tapsyrmasyna sáıkes, respýblıka boıynsha otyrǵyzylatyn 2 mlrd aǵashtyń 140 mln túbi Jambyl oblysynyń orman qoryna egiledi. Osy maqsatta Jambyl oblysy boıynsha keshendi jospar ázirlenip, orman jáne ań sharýashylyǵy komıtetimen kelisildi. Atalǵan josparǵa sáıkes 79,4 myń gektar orman qory jeri daıyndalady», - deıdi maman.
Budan ózge, respýblıka boıynsha eldi meken ishinde jáne onyń aınalasyna egiletin 15 mln túp aǵashtyń oblysqa tıesili 970 myń túp aǵashty otyrǵyzýdyń bes jyldyq jospary da bekitilgen.
Aldaǵy ýaqytta josparǵa sáıkes, aýdan jáne qala ákimdikterimen birlesken jumys júrgiziledi.
