Jambyl oblysynda bes mektep paıdalanýǵa berildi
Bilim kúnine oraı ashylǵan Birlesý-Eńbek orta mektebi demografııalyq ósimge baılanysty oryn tapshylyǵyn joıý maqsatynda jańadan boı kótergen. Jańa bilim mekemesinde balalardyń sapaly bilim alýlaryna barlyq jaǵdaı jasalǵan. Mektepte 18 oqý qabıneti, sport zaly, májilis zaly, ashana, 2 kompıýterlik synyp, robototehnıka jáne jańa modıfıkatsııalyq kabınetter bar.
Bıyl mektepte barlyǵy 250 oqýshy eki aýysymda oqymaq. Onda 39 pedagog qyzmet etse, onyń 12,5 paıyzy – jas mamandar.
«Jambyldyqtar jańa oqý jylyn jańa leppen bastamaq. Óńirde jyl saıyn jańa mektep pen balabaqshalar qurylysy qarqyn alyp keledi. Bul búgingi urpaqtyń bilim nárimen sýsyndap, ómirden óz ornyn taba biletin bilimdi, saýatty maman bolyp shyǵýy úshin jasalǵan qadam. Oblysta 2019-2020 oqý jylynda 5 mektep paıdalanýǵa berildi. Onyń bireýi úsh aýysymdy, bireýi apatty jaǵdaıdaǵy jáne úsheýi oryn tapshylyǵy bar mekteptiń máselesin sheship otyr. Atap aıtqanda, T.Rysqulov aýdany Jalpaqsaz aýylyndaǵy 48 oryndyq, Baızaq aýdany Aqsholaq stantsııasyndaǵy 120 oryndyq, Shý qalasy Toǵaı alqabyndaǵy 300 oryndyq, Jambyl aýdany Birlesý-Eńbek aýylyndaǵy 140 oryndyq, Merki aýdany Qazaq-Dıhan aýylyndaǵy 120 oryndyq orta jáne bastaýysh mektepteri jańa oqý jylyn jańa ǵımaratta bastaǵaly otyr», - dedi óńir basshysy Asqar Myrzahmetov quttyqtaý sózinde.
Qazirgi kezde óńirdegi úsh aýysymdy mekterdiń máselesi tolyǵymen sheshilgen. Bul týraly oblystyq Bilim basqarmasynyń basshysy Rahııa Turmaǵanbetova aıtyp berdi.
«Jyl sońyna deıin taǵy 4 nysan paıdalanýǵa beriledi. Qalǵan apatty jáne oryn tapshylyǵy bar mektepterdiń qurylysyn júrgizýge oblystyq bıýdjetten qarjy bólinip, máselesi kezeń-kezeńimen sheshiletin bolady. Bıyl oblystyń bilim júıesin qarjylandyrýǵa 130 mıllıard teńge bólinse, bul ótken jylmen salystyrǵanda 22,2 mıllıard teńgege artyq. Onyń 5,1 mıllıard teńgesi bilim berý nysandarynyń qurylysy men kúrdeli jóndeýge qarastyrylǵan. Búginde 15 bilim nysanynyń qurylysy júrgizilýde», -dedi R.Turmaǵanbetova.
