Jambyl oblysynda bes kúnde 53 keliden astam marıhýana tárkilendi

TARAZ. QazAqparat – Jambyl oblysynyń aýmaǵynda esirtki men psıhobelsendi zattardy jetkizý arnalarynyń jolyn kesýge baǵyttalǵan «Órmek» jedel aldyn alý is-sharasy ótkizildi. Bes kúndik is-shara barysynda zańsyz aınalymnan 53 keli 646 gramm «marıhýana» esirtki zaty tárkilendi,- dep habarlaıdy QazAqparat.

«Órmek» jedel-aldyn alý is-sharasynyń nátıjesinde 11 qylmystyq quqyq buzýshylyq anyqtaldy. Onyń ishinde tórteýi Qylmystyq kodekstiń 296-baby 4-bóligimen asa iri mólsherde esirtki zattaryn saqtaý, bireýi QR QK 300-babymen quramynda esirtki bar ósimdikterdi ósirý jáne QR QK 296-baby 1,2,3-bólikteri boıynsha alty qylmystyq teris qylyq derekteri bolyp tirkelgen.

«Aǵymdaǵy jyldyń 12 shildesi kúni Jambyl oblysynyń PD Esirtki qylmysyna qarsy is-qımyl basqarmasynyń qyzmetkerleri Jýaly aýdanynyń «Báıterek» jáne «Qyzylaryq» aýyldary arasyndaǵy tas jolynda Nur-Sultan qalasynda ýaqytsha turatyn, buryn sottalmaǵan jáne ýaqytsha jumyssyz Ózbekstan Respýblıkasynyń 36 jastaǵy azamatyn ustady. Odan salmaǵy 3 keli 786 gramm bolatyn «úndi marıhýanasy» tárkilendi. Sonymen qatar, dál osy kúni Shý aýdanynyń «Aspara-Tasótkel» qumdy aımaǵynda salmaǵy 5 keli 400 gramm «marıhýana» esirtki zatymen 34 jastaǵy Nur-Sultan qalasynyń turǵyny ustaldy»,- deıdi oblystyq polıtsııa departamenti baspasóz qyzmetiniń jetekshisi Gúlsara Muhtarqulova.

Qazirgi tańda kúdiktiler kinásin moıyndap, ýaqytsha ustaý ızolıatoryna qamaqqa alyndy. QR QK-niń 296-baby 4-bóligi boıynsha sotqa deıingi tergeý amaldary júrgizilýde.