Jambyl oblysynda bes adam gazdan ýlanyp, ekeýi kóz jumdy
TARAZ. QazAqparat – Jambyl oblysy Merki aýdanynyń Plodovoıagodnoe aýylyndaǵy jeke úıde bes adam gazdan ýlanyp, ekeýi oqıǵa ornynda kóz jumdy, dep habarlaıdy QazAqparat tilshisi.
Zardap shekken 3 adam jedel túrde aýrýhanaǵa jetkizilip, tıisti medıtsınalyq kómek kórsetilgen. Bul týraly «Óńirlik kommýnıkatsııa qyzmetiniń alańynda» ótken brıfıngte oblystyq TJD bastyǵynyń mindetin atqarýshy,
polkovnık Maqsat Qosybaev málim etti. Ol óńirdegi turǵyn úı sektorynda órtterdiń jáne ýly gazben ýlaný jaǵdaılarynyń aldyn alý jumystarynyń júrgizilýi,saqtyq sharalaryn ustaný barysy haqynda aıtty.
Aldyn ala málimetter boıynsha, Merkidegi qaıǵyly oqıǵa tabıǵı gazdaǵy peshtiń tútindigin ornatý erejelerin saqtamaýdan bolǵan. Búgin oblys ákiminiń tapsyrmasymen oqıǵanyń mán-jaıyn anyqtaý úshin quramynda Jambyl oblysy TJ departamentiniń, Merki aýdany ákimdiginiń jáne gaz kommýnaldyq kásipornynyń ókilderi kiretin arnaıy komıssııa quryldy.
«Atalǵan turǵyn úıde úgit-profılaktıkalyq jumys júrgizilgen. Bıylǵy jyldyń 15 qyrkúıeginde gaz jáne elektr aspaptaryn paıdalaný kezinde turmysta órt qaýipsizdigi talaptaryn saqtaý týraly jadynama taratylǵan bolatyn. Aǵymdaǵy jyldyń 17 tamyzy men 17 qyrkúıegi aralyǵynda ótkizilgen turǵyn úı sektorynda órt qaýipsizdigi aılyǵyn ótkizý josparyna sáıkes departament qyzmetkerleri «QazTransGazAımaq» AQ JPQ ókilderimen, volonterlermen, JPQ birlesip Merki aýdanynyń Plodovoıagodnoe aýylynda órttiń aldyn alý jáne halyqty órt qaýipsizdigi sharalaryna oqytý boıynsha úgit-nasıhat jumystaryn júrgizdi»,- dedi oblystyq TJD bastyǵynyń mindetin atqarýshy , polkovnık Maqsat Qosybaev.
Jalpy, Jambyl oblysynda 1 qazanǵa deıin jaýapty mekeme tarapynan turǵyn úılerge profılaktıkalyq jumys júrgizilgen. Nátıjesinde 2167 úıde 2863 órt qaýipsizdigi talaptarynyń buzýshylyqtary anyqtalyp, 743 úıde kemshilikter tolyǵymen joıylǵan.
Qazirgi ýaqytta gazdan ýlanyp, jansaqtaý bólimine jatqyzylǵan 3 adamnyń bireýi palataǵa aýystyrylyp, ekinshisi oblystyq balalar aýrýhanasyna jetkizildi.
