Jambyl oblysynda basqarma basshysy paramen ustaldy

ASTANA. QazAqparat - Jambyl oblystyq ákimdigine qarasty jerdiń paıdalanylýy men qorǵalýyn baqylaý basqarmasynyń basshysy 2 mln teńge para alǵany úshin ustaldy, dep habarlaıdy QR Memlekettik qyzmet isteri jáne sybaılas jemqorlyqqa qarsy is-qımyl agenttigi.

«2018 jyldyń 27 shildesinde aımaqtyq Jemqorlyqqa qarsy qyzmetiniń jasyryn tergeý is-áreketteriniń nátıjesinde Jambyl oblysy ákimdiginiń jerdiń paıdalanylýy men qorǵalýyn baqylaý basqarmasynyń basshysy T. esimdi azamat ustaldy», - delingen habarlamada.

Ol Jambyl oblysyndaǵy sharýa qojalyqtarynyń biriniń basshysynan jer telimin tıisinshe rásimdeýge kómektesý úshin 2 000 000 teńge kóleminde para aldy dep kúdikke ilinip otyr. Aldynda 50 myń AQSh dollaryna kelisip, sonyń 2 mln teńgesin alǵan bolýy múmkin.

Sotqa deıingi tergeý amaldary júrgizilýde.