Jambyl oblysynda balyq sharýashylyǵy arqyly týrızmdi damytýǵa kúsh salynady

TARAZ. QazAqparat - Jambyl oblysynda balyq sharýashylyǵy salasynda 21 ınvestıtsııalyq joba iske asyp jatyr, dep habarlaıdy QazAqparat oblys ákimdigine silteme jasap.

Rysqulov aýdanynda «Nomad» balyq sharýashylyǵynda balyq salasyn damytý boıynsha semınar-keńes ótti.

Jıyndy ashqan Jambyl oblysynyń ákimi Nurjan Nurjigitov balyq ósirý salasy aýyl sharýashylyǵynyń qarqyndy damyp kele jatqan sektorlarynyń biri ekenin atap ótti.

Jıynda tabıǵı resýrstar jáne tabıǵatty paıdalanýdy retteý basqarmasynyń basshysy Oljas Baqqaraev osy salanyń ahýaly jaıynda baıandady.

- Jambyl oblysynyń balyq sharýashylyǵyn damytý óńirlik baǵdarlamasyna sáıkes 2022 jyly oblysta 464,3 tonna taýarly balyq óndirý kózdelgen. 2022 jyldyń qorytyndysymen 483 tonna taýarly balyq óndirilip, baǵdarlamadaǵy kórsetkish tolyq oryndaldy. Bıyl 666,1 tonna balyq óndirý josparda,-dedi Oljas Baqqaraev.

Byltyr jergilikti bıýdjetten akvaósirýdi sýbsıdııalaýǵa 78,2 mln teńge qarajat bólingen.

Al, bıyl bul soma 281 mln teńgege artyp otyr.

Aıta keteıik, óńirde balyq salasyn damytý maqsatynda 1,4 mlrd teńgege 21 ınvestıtsııalyq joba iske asyrylyp jatyr.

- Bıyl oblysymyzda balyq salasyn sýbsıdııalaý kólemi úsh ese artty. Biz bul somany jyl saıyn kóbeıtýge tyrysamyz. Óńirde balyq sharýashylyǵyn damytýdyń bolashaǵy zor. Sondyqtan sý qoımalaryn týrıstik nysandarǵa aınaldyrýǵa bolady, bul balyq sharýashylyǵyna da, týrıstik salany damytýǵa da mol múmkindik beredi, - dep qorytyndylady oblys ákimi.