Jambyl oblysynda balasy quqyq buzǵan mektep oqýshysynyń ata-anasyna aıyppul salyndy
NUR-SULTAN. QazAqparat – Jambyl oblysynda mektepte oqıtyn balasy quqyq buzǵan ata-anaǵa 20 AEK kóleminde aıyppl salyndy.
Bul týraly QazAqparat QR Bilim jáne ǵylym mınıstrliginiń pedagogterdiń quqyqtaryn buzý faktileri boıynsha qabyldanǵan naqty sharalar týraly málimetterine silteme jasap habarlaıdy. Bul málimetti mınıstrliktiń baspasóz qyzmeti taratty.
«2020 jyldyń sáýirinde pedagogti kásibı qyzmetine qatysy joq ártúrli jumystarǵa tartýǵa jol bermeıtin, pedagogterdiń quqyqtaryn qorǵaý jónindegi jańa normalar kúshine endi. Búgingi kúni Bilim berý salasynda sapany qamtamasyz etý jónindegi aýmaqtyq departamentter pedagogterdiń quqyqtaryn buzý faktileri boıynsha birqatar sharalar qabyldady. Pedagogke taýarlar men kórsetiletin qyzmetterdi satyp alý mindetterin júkteý faktisi boıynsha Qostanaı oblysyndaǵy orta mektep dırektoryna «eskertý» túrindegi ákimshilik jaza qoldanyldy»,-delingen habarlamada.
Sondaı-aq onda Shymkent qalasy men Jambyl oblysynyń eki mektebiniń dırektorlaryna muǵalimderdi oqý kabınetterin jóndeýge tartqany jáne pedagogterden QR zańnamasynda kózdelmegen eseptilikti talap etkeni úshin «eskertý» túrindegi ákimshilik jaza qoldanylǵandyǵy aıtylǵan.
Sonymen qatar, Jambyl oblysynda mektep muǵaliminiń ar-namysy men qadir-qasıetine nuqsan keltiretin bylapyt sózdermen qorlaý jaǵdaıy anyqtaldy. Atalǵan quqyq buzýshylyq úshin besinshi synyp oqýshysynyń ata-anasyna 20 AEK kóleminde aıyppul salynyp, ákimshilik jaýapqa tartyldy.
«Osylaısha, bilim berý salasyndaǵy ýákiletti organ pedagogterdiń Qazaqstan Respýblıkasynyń zańnamasymen bekitilgen quqyqtary men zańdy múddelerin buzatyn azamattyq jáne laýazymdy tulǵalarǵa qatysty zańnamada kózdelgen barlyq sharalardy qoldanady. Pedagogterdiń quqyqtary buzylǵan jaǵdaıda ornalasqan jeri boıynsha aýmaqtyq departamentke habarlasýdy usynamyz»,-delingen baspasóz qyzmetiniń málimetterinde.
