Jambyl oblysynda balalardyń jazǵy demalysyna 315 mln teńge jumsalady
TARAZ. QazAqparat - Bıyl jambyldyq balalar mektep janyndaǵy lagerlerde, respýblıkalyq saýyqtyrý ortalyqtarynda demalatyn bolady.
Onda balalarǵa arnalyp túrli mádenı jáne sporttyq is-sharalar uıymdastyrylady, dep habarlaıdy QazAqparat Jambyl oblysy ákimdiginiń baspasóz qyzmetine silteme jasap.
Jazǵy demalyspen óńir oqýshylaryn 100 paıyz qamtý josparlanýda. Bul 1-10 synyp aralyǵynda bilim alyp jatqan 196 566 oqýshy. Olardyń arasynda jetim, tolyq emes otbasy jáne múmkindigi shekteýli balalar sanattaryna jatqyzylǵan 60 451 oqýshy bar.
Óńirde tabıǵaty erekshe Jambyl, Jýaly, Baızaq, Qordaı, Merki, Rysqulov jáne Sarysý aýdandarynda ornalasqan alty memlekettik jáne tórt jekemenshik saýyqtyrý lageri jumys jasaıdy. Qala shetinde ornalasqan barlyq lagerler zamanaýı qurylǵylarmen jaraqtandyrylyp, oıyn jáne sporttyq alańdarmen, basseıindermen jabdyqtalǵan. Sondaı-aq balalar úshin mektep janynan shatyrly lagerler, respýblıkalyq saýyqtyrý ortalyqtary, aýlalyq klýbtar ashylady. Ekskýrsııalar, týrıstik baǵyttar, sporttyq jarystar, úıirmeler men eńbek jasaqtary jumys jasaıtyn bolady.
Ár mektepte túrli ıntellektýaldyq is-sharalar jospary ázirlengen. Bilim berý qyzmetkerleriniń qatysýymen qala shetindegi lagerler men mektep janyndaǵy alańdarda aǵa tálimgerler úshin oqý semınarlaryn ótkizý josparlanýda.
Áleýmettik jaǵynan az qamtylǵan otbasynan shyqqan 5 691 jáne 70 daryndy bala memlekettik bıýdjet esebinen EKSPO-2017 kórmesin tamashalaı alady.
Budan basqa, jaz mezgilinde qazaq-túrik mektep-ınternattary bazasynda aǵylshyn tilin oqytý úshin Jambyl JOO-nyń stýdentterin erikti retinde tartý da josparlanyp otyr.
Oblys ákimdigi balalardyń jazǵy demalysyn qarjylandyrý kóleminiń jyl saıyn ósip otyrǵandyǵyn atap aıtty. 2015 jyly jergilikti bıýdjetten 243,2 mln teńge, 2016 jyly - 280,9 mln teńge bólingen. Al bıyl balalardyń jazǵy demalysyn uıymdastyrýǵa jergilikti bıýdjetten 315,2 mln teńge kózdelip otyr.
