Jambyl oblysynda balalardyń turmystyq hımııa men dárilerden ýlanýy jıilegen

TARAZ. QazAqparat - Jyl saıyn turmystyq hımııanyń, kúshti áser etetin dárilerdiń, ekzotıkalyq ósimdikterdiń sany artyp keledi. Sonyń saldarynan hımııalyq zattardan balalardyń ýlaný jaǵdaılary da jıileýde, dep habarlaıdy QazAqparat tilshisi.

Jambyl oblystyq densaýlyq saqtaý basqarmasy baspasóz qyzmetiniń bergen málimetterine súıensek, byltyr oblystyq kópbeıindi balalar aýrýhanasyna dári-dármekten ýlanǵan 242 bala túsken, onyń 37-si aýrýhanaǵa jatqyzylǵan. Bıyl jeti aı ishinde 156 bala túsip, onyń 17-si aýrýhanaǵa jatyp emdelip shyqqan. Munyń ishinde 13-i kúıikpen túsken. Óńeshi sirke qyshqylynan kúıip qalǵan eki bala aýrýhanaǵa jatqyzylǵan.

Turmystyq hımııalyq zattarmen ýlaný boıynsha byltyr balalar aýrýhanasyna jalpy sany 188 bala túsip, onyń 37-si aýrýhanaǵa jatqyzylǵan. Al osy jyldyń 7 aıynda 130 bala ýlanyp, onyń 26-sy aýrýhanaǵa jatyp emdelgen.
Mamandar ýlaný jaǵdaılary kóbinese ata-analardyń abaısyzdyǵynan oryn alatynyn aıtyp, dári-dármekter men hımııalyq zattardy balalardyń qoly jetpeıtin jerde ustaý qajettigin eskertýde.
Aıta keteıik, buǵan deıin Taraz neırohırýrgteri talma dertine shaldyqqan balalardy emdep jatqanyn jazǵan bolatynbyz.