Jambyl oblysynda azyq-túlik qory jetkilikti
Oblys ákimi orynbasarynyń aıtýynsha, Jambyl oblysynyń azyq-túlik qory halyqtyń qajettiligin 2-3 aıǵa qamtamasyz ete alady.
«Jambyl oblysynyń kókónis saqtaý qoımalary men ózge de qoımalarynda 16,1 myń tonna azyq-túlik qory bar. Onyń ishinde kartop - 1210 tonna, pııaz – 5459 tonna, sábiz – 7 363 tonna, sút ónimderi – 675 tonna, qyryqqabat – 67 tonna. Sondaı-aq, bólshek saýda nysandarynda 1,7 myń tonnadan astam kókónis ónimderi, 350 tonna et, 1008 tonna un, 488 tonna kúrish, 254 tonna qaraqumyq, 165 tonna makaron ónimderi, 300 tonna ósimdik maıy jáne basqa da azyq-túlik taýarlary bar»,- dedi N.KalenderovÓKQ aqparat alańynda.
Spıker budan basqa oblystyń turaqtandyrý qorynda 1,3 myń tonna kókónis ónimderi, 2,6 myń tonna qant, 3 myń tonna un jáne basqa da birinshi qajettiliktegi taýar qory saqtalynǵandyǵyn jetkizdi.
«Kún saıyn bazarlar men qoımalarǵa birinshi qajettilik ónimderiniń qosymsha kólemi túsýde. Oblys ákimdigi janyndaǵy jumys toby áleýmettik mańyzy bar azyq-túlik ónimderine kúndelikti monıtorıng júrgizýde. Taýarlardyń qunyn negizsiz ósirý faktileri tirkelmedi. Oblys ákimdiginde senim telefony 45-31-24 (jumys ýaqytynda) quryldy. Osyǵan oraı oblystyń árbir turǵyny áleýmettik-mańyzdy taýarlar baǵalary negizsiz ósý faktileri bolǵan jaǵdaıda atalǵan senim telefonyna habarlassa bolady»,-dep atap ótti aımaq basshysynyń orynbasary.
Jalpy, búgingi tańda óńirdiń azyq-túlik naryǵyndaǵy ahýal turaqty. Oblys aýmaǵyndaǵy saýda oryndarynda tolassyz kezekte turý jaǵdaılary tirkelmegen.
