Jambyl oblysynda azyq-túlik qory jetkilikti - ákimdik
TARAZ. QazAqparat – Jambyl oblysynda búgingi tańda azyq-túlik naryǵyndaǵy ahýal turaqty. Oblys aýmaǵyndaǵy saýda oryndarynda tolassyz kezekte turý jaǵdaılary tirkelmegen. Bul týraly habarlaǵan óńir ákiminiń baspasóz qyzmeti turǵyndardy bosqa dúrlikpeýge jáne jalǵan aqparattardy taratpaýǵa shaqyrdy, dep habarlaıdy QazAqparat.
Jambyl oblysynyń kókónis saqtaý qoımalary men ózge de qoımalarynda 16,1 myń tonna azyq-túlik qory bar. Onyń ishinde kartop - 1210 tonna, pııaz – 5459 tonna, sábiz – 7 363 tonna, sút ónimderi – 675 tonna, qyryqqabat – 67 tonna.
Sondaı-aq, bólshek saýda nysandarynda 1,7 myń tonnadan astam kókónis ónimderi, 350 tonna et, 1008 tonna un, 488 tonna kúrish, 254 tonna qaraqumyq, 165 tonna makaron ónimderi, 300 tonna ósimdik maıy jáne basqa da azyq-túlik taýarlary bar.
«Budan basqa, oblystyń turaqtandyrý qorynda 1,3 myń tonna kókónis ónimderi, 2,6 myń tonna qant, 3 myń tonna un jáne basqa da birinshi qajettiliktegi taýar qory saqtaýly. Qolda bar azyq-túlik qory oblys halqynyń qajettiligin 2-3 aıǵa qamtamasyz ete alady. Bul rette, kún saıyn bazarlar men qoımalarǵa birinshi qajettilik ónimderiniń qosymsha kólemi túsýde», - delingen baspasóz málimetinde.
Oblys ákimdigi janyndaǵy jumys toby áleýmettik mańyzy bar azyq-túlik ónimderine kúndelikti monıtorıng júrgizýde. Taýarlardyń qunyn negizsiz ósirý faktileri tirkelmegen. Áleýmettik mańyzy bar taýarlarǵa qatysty baǵa kóterýdiń qandaı da bir faktileri týraly 45-21-24 telefon nómirine (jumys ýaqytynda) habarlaýǵa bolady.
