Jambyl oblysynda ázirshe qoǵamdyq kólikter júrmeıdi
TARAZ. QazAqparat – Jambyl oblysynda sulýlyq salondary, jazǵy kafeler men qurylys bazarlarynyń jumysy qaıta jandanady. Bul óńirdegi karantın rejımin jeńildetýdiń úshinshi kezeńi boıynsha júzege aspaq, dep habarlaıdy Jambyl oblysy ákimdiginiń baspasóz qyzmetine silteme jasap.
2020 jyly 19 mamyrda Jambyl oblysynda karantınniń jeńildetýdiń úshinshi kezeńi kúshine enedi. Bul týraly oblys ákiminiń baspasóz qyzmeti habarlady.
«Birqatar oblystarda koronavırýstyq ınfektsııalar sanynyń kúrt ósýine baılanysty, sondaı-aq aımaqtaǵy qazirgi epıdemıologııalyq jaǵdaıdy eskere otyryp, Jambyl oblysynyń jedel shtaby karantındik sharalardy tek ishinara jeńildetý týraly sheshim qabyldady»,-delingen habarlamada.
Atap aıtsaq, oblys boıynsha tómendegilerdiń jumysyna ruqsat etiledi:
- monsha keshenderinen tys shashtarazdar men sulýlyq salondary (aldyn-ala jazylý boıynsha). jumys ýaqyty 10.00-den 18.00-ge deıin);
- jazǵy alańy bar, ashyq aspan astynda jumys jasaıtyn qoǵamdyq tamaqtaný oryndary (syıymdylyǵy 30 adamnan aspaıtyn). 10.00-den 20.00-ge deıin;
- qurylys materıaldary men turmystyq taýarlardy satý bazarlary. 7.00-den 17.00-ge deıin;
- qonaq úıler.
Sondaı-aq, erteńnen bastap Taraz qalasy aýmaǵynda ornalasqan túlekterdi UBT-ǵa daıyndaý boıynsha oqý ortalyqtarynyń qyzmetine ruqsat etiledi.
«Joǵaryda atalǵan kásip túrleriniń jumysyn qalpyna keltirýdiń mindetti sharty sanıtarlyq-epıdemıologııalyq talaptardy qatań saqtaý bolyp tabylady. Muny arnaıy mobıldi toptar qadaǵalaıtyn bolady.
Oblys turǵyndarynyń densaýlyǵynyń qaýipsizdigin qamtamasyz etý maqsatynda, sondaı-aq ınfektsııanyń joǵary qaýpine baılanysty qoǵamdyq kólikter toqtatylǵan bolatyn. Qazirgi kezdegi qalyptasyp otyrǵan epıdemııalyq jaǵdaı marshrýttyq avtobýstardyń jumysyn qaıta jandandyrýǵa múmkindik bermeýde. Oblys turǵyndarynan buǵan túsinistikpen qaraýdy suraımyz»,-delingen vedomstvo habarlamasynda.
Atalǵan jeńildikter COVID-19 taralý oshaqtary bar Qordaı, Baızaq jáne Jambyl aýdandarynan basqa oblystyń barlyq aýmaǵynda qoldanylady.
Oblys pen Taraz qalasynyń perımetri boıynsha avtojoldarda, koronavırýs aýrýy anyqtalǵan eldi mekenderde karantındik sharalar alynyp tastalǵansha blok-posttar óz jumysyn jalǵastyratyn bolady. Turǵyndardyń qozǵalysy da shekteýli kúıinde qala bermek.
