Jambyl oblysynda aýyldar ishimdikten bas tartyp jatyr
TARAZ. QazAqparat – Ramazan aıynda Jambyl aýdanyna qarasty Sháken Nııazbekov, Shaıqoryq, Tanty, Qapal aýyldary ishimdikten túbegeıli bas tartyp, úlgi kórsetýde. Atalmysh 4 eldi mekendegi 22 dúkenniń ıeleri ishimdik satýǵa berilgen lıtsenzııalaryn qaıtaryp bergen, dep habarlaıdy QazAqparat tilshisi.
Aýyl qarııalary men jalyndy jastardyń bastamasyn turǵyndar atalǵan bastamany jappaı qoldap, ár kásipkerlik nysannyń esigin qaǵyp, úgit-nasıhat jumystaryn jandandyrdy. Nátıjesinde, dúken ıeleri tek osy aıda ǵana emes, ishimdikti múlde satylymǵa shyǵarmaıtyny týraly habarlap, alkogol ónimderin satý jónindegi lıtsenzııalaryn oblystyq kirister basqarmasyna ótkizdi.
Osylaısha, Ramazan aıy Jambyl aýdanynda erekshe leppen bastaý aldy.
Jurtshylyqtyń qýanyshyna ortaqtasýǵa kelgen aýdan ákimi Sáken Arýbaev pen QR Sybaılas jemqorlyqqa qarsy is-qımyl agenttiginiń oblys boıynsha departamenti basshysynyń birinshi orynbasary Ravıl Tólebaev kásipkerlik nysan ıelerimen jolyǵyp, birlesken Alǵys hattaryn tabys etti.
Osyndaı jaqsylyqtyń bel ortasynda júrgen jastarmen jolyqqan Sáken Arýbaev:
«Birlesken iste bereke bar» degen maqal osy aýyldyń turǵyndaryna qarata aıtylsa kerek. Qasıetti aıdaǵy bul ıgilik tóbemizdi kókke jetkizdi. Dúken ıeleri ishimdikti satpaı ǵana qoıǵan joq, olar zorlyq-zombylyqtyń aldyn alyp, túrli quqyqbuzýshylyqtardy joıdy, – dedi.
Mundaı jan jadyratar jańalyqqa Damır Tashqaraev basshylyq etetin «Ar-Rashıd rýhanııat» qoǵamdyq birlestiginiń úlesi ushan-teńiz ekenin jergilikti jurtshylyq jaqsy bilse kerek. Muny ańǵarǵan Ravıl Qýanyshbaıuly:
«Jastardyń meıirimdilike, qaıyrymdylyqqa, jasylyqqa bet burýy erteńimizdi aıqyndap turǵandaı. Búginde «ishimdiksiz aýyl» atanǵan eldi mekenderdiń bastamasyn basqa aýyldar ilip alyp ketti. Olardyń qatarynda Moıynqum, Baızaq aýyldary bar. Qaıyrly amalǵa atsalysqan barsha azamattarǵa sheksiz rızashylyǵymdy bildiremin», – dedi Ravıl Tólebaev.
Aýyl azamattary elimizdiń barlyq eldi-mekenine osyndaı qaıyrly amaldy estafeta etip joldady
