Jambyl oblysynda aýyl mańynan jerge kómilgen qarý-jaraqtar tabyldy

TARAZ. QazAqparat – Jambyldyq polıtseıler jerge kómilgen birneshe qarý-jaraqty tapty, - dep habarlaıdy QazAqparat tilshisi.

Jambyl oblysy Polıtsııa departamentiniń qyzmetkerlerimen jedel-izdestirý is-sharalaryn júrgizý barysynda Jambyl aýdany Qostóbe aýylynyń mańynan jasyrylǵan qarý-jaraq tabyldy.

«Belgisiz adamdar 8 birlik avtomat pen oǵan arnalǵan 17 oqjatar, 1 granata, 12 kalıbrli gaz-travmattyq qarý, «Krall» markaly myltyq jáne 1 dana pyshaqty qapqa salyp, jerge kómip ketken.

Atalǵan derek boıynsha QR Qylmystyq kodeksiniń 287-baby 3-bóligimen sotqa deıingi tergep-tekserý amaldary júrgizilýde. Sot-ballıstıkalyq saraptama taǵaıyndaldy», - dep habarlady Jambyl oblysy PD bastyǵynyń orynbasary polıtsııa polkovnıgi Nurjan Qalmetov.

Jambyl oblysynyń Polıtsııa departamenti qarýdyń, oq-dárilerdiń, arnaıy quraldardyń orny týraly habarlaǵan nemese olardy polıtsııaǵa óz erkimen tapsyrǵan adam qylmystyq jáne ákimshilik jaýapqa tartylmaıtynyn eske salady.

Tabylǵan qarý-jaraq, oq-dáriler jáne arnaıy quraldar týraly aqparatty polıtsııaǵa jetkizý týraly habarlamadan soń, «102» arnasyna turǵyndardan qońyraýlar kelip túsýde.