Jambyl oblysynda atqa minip, joǵalyp ketken 7 jasar bala tabyldy
TARAZ. QazAqparat – Jambyl oblysynda joǵalyp ketken 7 jasar Erik Rysbaıdy izdeý jumysy aıaqtaldy. Bala din aman, onyń ómirine eshqandaı qaýip tónip turǵan joq, dep habarlaıdy QazAqparat tilshisi.
Jambyl oblystyq polıtsııa departamentiniń bastyǵy, polıtsııa general-maıory Janat Súleımenov kámeletke tolmaǵan balany aýqymdy izdestirý is-sharalaryn ózi basqardy.
Balany polıtsııa qyzmetkerleri men janashyr jergilikti turǵyndar Kókjilek aýylynda, qamys arasynan tapty. Ol keshe túnde sol jaqta túnep shyqqan. Bul týraly oblystyq polıtsııa departamentiniń baspasóz qyzmeti habarlady.
«Balany izdestirýge 400-den astam adam, onyń ishinde polıtsııa, ákimdik, tótenshe jaǵdaılar departamenti qyzmetkerleri, eriktiler, sondaı-aq TJD tikushaǵy jáne jergilikti orman sharýashylyqtarynyń biriniń AN-2 ushaǵy jumyldyryldy» delingen vedomstvo habarlamasynda.
Eske sala keteıik, buǵan deıin 15 qyrkúıek kúni Jambyl oblysy Moıynqum aýdanynda Kúsháman aýylynyń jeti jasar balasy úıden atpen shyǵyp, joǵalyp ketkendigin habarlaǵan bolatynbyz.
